Нийслэлийн 371 жилийн ойд зориулсан улс, аймгийн алдар цолтой хүчит 128 бөхийн барилдаан дөнгөж сая өндөрлөлөө. Даян аварга Г.Өсөхбаяр, улсын арслан До.Ганхуяг, Х.Мөнхбаатар, Д.Азжаргал, улсын гарьд И.Доржсамбуу, Н.Ганбаатар, улсын заан Б.Соронзонболд, М.Өсөхбаяр нарын шилдэг бөхчүүд зодоглосон нийслэлийн ойн барилдаанд Сэлэнгэ аймгийн Мандал сумын харьяат, Хил хамгаалах ерөнхий газрын “Хилчин” спорт хороо, “Ноёд” группийн бөх, Монгол Улсын өсөх идэр начин Гунаажавын Эрхэмбаяр түрүүлж, Булган аймгийн Бүрэгхангай сумын харьяат, Хил хамгаалах ерөнхий газрын “Хилчин” спорт хороо, “Жигүүр гранд” группийн бөх, Монгол Улсын залуу заан  Мөнхсайханы Өсөхбаяр үзүүрлэлээ. Барилдааны их шөвөгт Говь-Алтай аймгийн Чандмань сумын харьяат, улсын гарьд Нямдоржийн Ганбаатар, Сэлэнгэ аймгийн Орхонтуул сумын харьяат, улсын өсөх идэр начин Түвдэндоржийн Өсөх-Ирээдүй нар шалгарч үлдсэн юм.

Нийслэлийн 371 жилийн ойд зориулсан хүндэтгэлийн барилдааныг Монгол Улсын Ерөнхий сайд С.Батболд, НИТХ-ын дарга Т.Билэгт, нийслэлийн Засаг дарга бөгөөд Улаанбаатар хотын захирагч Г.Мөнхбаяр, нийслэлийн Засаг даргын Тамгын газрын дарга Ц.Болдсайхан, Улаанбаатар хотын ерөнхий менежер Ч.Бат, Засгийн газрын хэрэгжүүлэгч агентлаг БТСГ-ын дарга Ч.Наранбаатар нарын удирдлагууд үзэж сонирхлоо.

Нийслэлийн өдөрт зориулсан үндэсний бөхийн барилдааныг 1994 оноос эхлэн жил бүрийн аравдугаар сарын 29-ний өдөр зохион байгуулдаг болсон бөгөөд анхны барилдаанд дархан аварга Б.Бат-Эрдэнэ түрүүлж байсан юм. Дархан аварга Б.Бат-Эрдэнийн хувьд энэхүү уламжлалт барилдаанаас нийт таван удаа түрүү хүртсэн нь хамгийн олонд тооцогддог ажээ.

Тавын даваа:

1.даян/ав Г.Өсөхбаяр – у/н Т.Өсөх-Ирээдүй
2.у/г И.Доржсамбуу – у/н Г.Эрхэмбаяр
3.у/г Н.Ганбаатар – а/а Ш.Жаргалсайхан
4.у/з М.Өсөхбаяр – П.Бүрэнтөгс

Зургаагийн даваа:

1.у/г Н.Ганбаатар – у/н Г.Эрхэмбаяр
2. у/з М.Өсөхбаяр – у/н Т.Өсөх-Ирээдүй

Долоогийн даваа:

1.у/з М.Өсөхбаяр – у/н Г.Эрхэмбаяр