Зүүн аймгуудад малын гоц халдварт шүлхий өвчин гарсантай холбогдуулан Нийслэлийн мэргэжлийн хяналтын газраас нийслэлд мал, амьтан тэдгээрийн гаралтай бүтээгдэхүүнээр үйлдвэрлэл үйлчилгээ эрхэлж байгаа аж ахуйн нэгж, иргэдийн үйл ажиллагаанд шалгалт хийжээ. Шалгалтад давхардсан тоогоор мах, махан бүтээгдэхүүнээр худалдаа, үйлчилгээ эрхэлж буй 39 хүнсний худалдааны төв, 329 хүнсний дэлгүүр, 14 мах боловсруулах үйлдвэр, 32 хиамны цех хамрагджээ. Мөн 16 мах машиндах цэг, 23 мах, махан бүтээгдэхүүн ангилан савлах цех, 40 банш буузны цех, 20 мал эмнэлэг ариун цэврийн лабаоратори,127 нийтийн хоолны газар, 10 мал нядалгааны газар, 1197 мах, махан бүтээгдэхүүний лангуу, нөөцийн мах худалдан борлуулж буй найман аж ахуйн нэгжийг шалгажээ. Түүнчлэн түүхий эдийн зах, түүхий эдийн агуулах, ясны үйлдвэр, өлөнгийн үйлдвэр, малын тэжээлийн үйлдвэр, ноос ноолуур угаах самнах сүлжих үйлдвэр, өлөнгийн өнгөр боловсруулах үйлдвэрийг тус тус шалгажээ.

Шалгалтаар худалдааны төвүүдээр худалдаалж байгаа импортын загас далайн гаралтай бүтээгдэхүүний баталгаажилт хангалтгүй, хэзээ хаанаас ямар зөвшөөрөлтэйгээр импортлогдсон нь тодорхойгүй байжээ. Нийт худалдааны төвүүдийн 60 гаруй хувь нь лангуу, павильон түрээслэгчдэд хувцас солих, ахуй хангамжийн өрөөг шаардлагын дагуу бэлтгэж өгдөггүйгээс хувцас, хэрэглэлээ үйлчилгээ хийж байгаа лангууны дор хийдэг. Мөн махыг лангуу болон өлгүүрт хэт олноор овоолж тавьсан, ил задгай тавьж худалдаалдаг, зориулалтын бус хайрцаг, цаас дэвсдэг зэрэг нийтлэг зөрчил дутагдлууд илэрчээ. Түүнчлэн иимпортын загас, далайн гаралтай боловсруулаагүй түүхий бүтээгдэхүүнүүдийг Меркури худалдааны төв, “Бээжин”,”Солонгос” хүнсний дэлгүүрээр худалдаалагддаг гэх боловч боловч эдгээрийн 40 гаруй хувь нь ямар нэг зөвшөөрөлгүйгээр ганзагаар зөөвөрлөгдөн ир шинжилгээ баталгаажилтгүйгээр худалдаалагдаж байжээ.

Шалгалтын явцад нийт 388 зөрчил илрүүлж, газар дээр нь 270 –ийг арилгуулан 14 аж ахуйн нэгж, 65 иргэн, 13 албан тушаалтанд 3705.0 мянган төгрөгийн торгуулийн арга хэмжээ авч лабораторийн шинжилгээнд 479 дээж хамрууллаа. Харин 29 аж ахуйн нэгжид нийт 165 заалт бүхий албан шаардлага өгч, нэг махны худалдааны төв, дөрвөн иргэний мах шулах газар, нэг лаборатори, гурван мал нядалгааны цэгийн үйл ажиллагааг түр хугацаагаар хааж, зөрчлийг арилгуулан үйл ажиллагааг нь дахин сэргээсэн байна.

П.Наран