АНУ-ын Батлан хамгаалах яам өнгөрсөн бямба гаригт Вайоминг мужийн Агаарын нисэх хүчний «Уоррен» баазад гарсан онцгой хэргийн талаар энэ сарын 27-нд мэдээлсэн байна. Цахилгаан дамжуулалтад гарсан саатлын улмаас цэргийнхэн тив алгасан нисэх  «Минитмен III» 50 баллистик пуужингийн хяналтаа алдсан байжээ.

 Пентагон иргэддээ түгших хэрэггүй, пуужингийн санамсар­гүй харвалт байхгүй гэж мэ­дээлэв. Болсон хэргийн талаар ерөнхийлөгчид мэдээлсэн байна.

Вайоминг мужийн Агаарын нисэх хүчний «Уоррен» баазын цэргийнхэн тив алгасан нисэх, цөмийн цэнэгтэй «Минитмен III» 50 баллистик пуужингийн хяналтаа бараг цаг орчим алдсан тухай CNN мэдээлсэн байна. Хэрэг явдал өнгөрсөн бямба гаригт болсон ч ерөнхийлөгчид мэдээлсний дараа дөнгөж энэ долоо хоногт энэ тухай тодорхой мэдээлэл гарчээ.

АНУ-ын Батлан хамгаалах яам­ны төлөөлөгч командын байр ба пуужингийн хооронд хол­боо нь цахилгааны саатлын ул­маас тасалдсан гэж хэлэв. Санам­сар­гүйгээр пуужин харвах боломж байгаагүй гэж тэрбээр онцолсон бай­лаа. Агаарын нисэх хүчний ко­мандлал  цахилгааны хангамж сэр­гэтэл пуужингуудыг хяналтаа ав­сан байсан. “Хүн амд аюул бай­гаа­гүй” гэсэн түүний үгийг  Wall Street Journal сонин иш татлаа.

Пентагоны бас нэг төлөөлөгч мэдэгдэхдээ онц байдал үүссэн шалтгааныг тодруулж байна гээд “Пуужингууд нь олон давхар хамгаалалтын системтэй” хэмээн са­нуулжээ.  Агаарын нисэх хүч­ний төлөөлөгч IV Весли Миллер мэдэгдэхдээ “цахилгааны тасалд­лаас тив алгасан нисэх баллистик пуужингийнхаа 11 хувийн хянал­тыг алдсан байлаа” гэсэн юм. Цэр­гийнх­ний хэлснээр цахилгаан тасарсан үеэр командлал нь пуу­жингийн байдлын талаар шал­галт хийх боломжгүй болсон бө­гөөд хэрэв команд ирсэн бол  системүүдтэй холбоо барин пуу­жинг хөөргөж чадахгүй болсон байжээ. “Ерөнхийлөгч тэднийг харвана гэсэн бол дуртай цагтаа л үүнийг хийж болох байсан” гэж цэргийн бас нэг тушаалтан хэлэв. Цахилгааны саатлын шалтгаан тодорхойгүй, санаатайгаар сүл­­жээнд саатал гаргасныг үгүйс­гэхгүй гэж цэргийнхэн хэлж байгаа. Зарим мэдээгээр газар дор тавигдсан кабельд гэмтэл гарсан байж болох ажээ.

Одоо АНУ-ын зэвсэглэлд 500 цөмийн цэнэгтэй 450 ширхэг Minuteman III пуужин байгаа ба  Малмстром бааз (Монтана), Фрэнсис Уоррены нэрэмжит бааз (Вайоминг) ба нисэх бааз Минот (Хойд Дакота) гуравт тус бүр 150 пуужин газар доорх байрлалд жижүүрлэж байна.

Болсон хэргийн талаар Штабын дарга нарын нэгдсэн товчооны тэргүүн Майкл Маллен Батлан хамгаалахын сайд Роберт  Гейтст мэдэгдсэн байв. Гейтс цөмийн аюулгүй байдалд ихээхэн анхаарал тавьдаг. Цөмийн цэнэгтэй холбоотой хэргүүд 2008 онд гарч байхад тэрээр Штабын дарга нарын нэгдсэн товчооны тэргүүн ба Нисэх хүчний командлагч хоёрыг огцруулж байлаа.

Дашрамд тэмдэглэхэд ийм хэрэг 10 жилийн өмнө гарч байсан нь сая тодорхой болсон байв. Штабын дарга нарын нэгдсэн товчооны тэргүүн асан генерал Хью Шелтон дурсамжийн номондоо ерөнхийлөгч байсан Билл Клинтоны туслах “цөмийн чемоданы” кодыг гээчихсэн байснаа хэдэн сар нуусан тухай бичсэн байна. Генералын дурсамжаар ийм явдал 2000 онд болжээ. Сар бүр Цагаан ордонд кодын шалгалт хийгддэг байсан ба кодуудыг хадгалсан туслах нь түүнийг одоо ерөнхийлөгчид байгаа гэж хэд хэдэн удаагийн шалгалт дээр хэлж байсан ажээ. Тэрээр Клинтон чухал хуралтай учир түүнээс код асууж ажлыг нь тасалдуулах хэрэггүй гэж хэлдэг байсан гэнэ.

Цөмийн чемоданы кодоо АНУ дөрвөн сард нэг удаа сольдог байна. Яг тэр үеэр л тэр хүн кодыг хаячихсан гэдгээ хүлээн зөвшөөрсөн ба харин Билл энэ талаар мэдээгүй өнгөрсөн ажээ.