Ираны эсрэг авах шинэ хориг арга хэмжээг ярилцахад Хятад оролцоход бэлэн байгаа тухай НҮБ-д суугаа Их Британийн төлөөлөгч Марк Лиал Грантаас (Mark Lyall Grant) иш татан The Washington Post сонин мэдээлэв.  Британийн дипломатын хэлснээр Ираны цөмийн асуудлаар явагдсан телефон хурлын үеэр Барууны санал болгосон Ираны эсрэг авах шинэ хориг арга хэмжээнд улс нь оролцоно гэсэн ойлголтыг Хятадын төлөөлөгч өгсөн байна. Телефон хуралд Их Британи, Герман, Франц, АНУ, Орос, Хятад оролцжээ.
Өмнө нь Хятад асуудлыг дипломат аргаар шийдэх ёстой гэж мэдэгдэж байсан юм. Хэдхэн хоногийн өмнө АНУ-ын Төрийн нарийн бичгийн дарга шинээр авах хориг арга хэмжээг “араа шүдтэй” гэж тодорхойлж байв. Шинэ хориг арга хэмжээний төслийг АНУ энэ сарын 3-нд Хятад ба Орост танилцуулахаар өгсөн байна. Дараагийн өдөр нь Хятад асуудлыг зөвхөн яриа хэлцлээр л шийдэх хэрэгтэй гэж байлаа. Оросын Ерөнхийлөгч Дмитрий Медведев Ираны эсрэг шинэ хориг арга хэмжээ нь “ухаалаг байх ёстой” гэж Францад айлчлахдаа хэлсэн юм. Өмнө мэдээлж байснаар шинэ хориг нь НҮБ-ын Аюулгүйн зөвлөлийн өмнөх тогтоолуудад үндэслэгдсэн ба хоригт Ираны эдийн засгийн банк, даатгалын салбар болон усан тээврийг хамруулах гэнэ. Баруун ба Ираны сөргөлдөөн өнгөрсөн хоёрдугаар сард Иран 20 хувиар уран баяжуулсан гэж мэдэгдсэний дараа хурцадсан байна. Ираны Ерөнхийлөгч Махмуд Ахмадинежад өөрийн орноо ураны нягтарлыг 80 хувьд хүргэх чадалтай гэхдээ үүнийг хийх хэрэгцээ бидэнд байхгүй гэсэн байна.