УИХ-ын Төрийн байгуулалтын байнгын хорооны өнөөдрийн хуралдаанаар Үндсэн хуулийн цэцийн гишүүдэд нэр дэвшүүлэх асуудлыг хэлэлцлээ. Үндсэн хуулийн цэцийн дарга Ж.Бямбадорж, цэцийн гишүүн П.Очирбат нарын бүрэн эрхийн хугацаа өнгөрсөн есдүгээр сард дуусгавар болсон тул тэднийг дахин томилох буюу бүрэн эрхийн хугацааг нь дуусгавар болгох асуудлыг шийдэх учиртай болжээ.

Иймээс Ж.Бямбадорж, П.Очирбат нарыг Үндсэн хуулийн цэцийн гишүүнээр дахин томилуулах саналаа байнгын хорооны дарга Ө.Энхтүвшин гишүүдэд танилцуулав. Эдгээр эрхмүүдийг дахин нэр дэвшүүлэхдээ УИХ-ын дарга болон дэд дарга нар, УИХ дахь намын бүлгийн дарга нарт танилцуулж саналыг нь авсны үндсэн дээр мэдүүлж байгаа гэдгээ онцолсон юм. Санал хураахад байнгын хорооны хуралдаанд оролцсон 12 гишүүнээс 11 нь Ж.Бямбадорж, П.Очирбат нарыг Үндсэн хуулийн цэцийн гишүүнээр дахин томилохыг дэмжлээ.

Г.Дарь