Хойд Америкийн Үндэсний сагсан бөмбөгийн холбооны алдарт тоглогч Аллен Айверсон Туркийн багт тоглохоор боллоо. Тус улсын “Бешикташ” баг түүний хойноос нэлээд хөөцөлдсний эцэст “Хариулт” хочтой тоглогчийг өөрийн болгожээ. Хоёр тал тохиролцсоноор хоёр жилийн дөрвөн сая ам.долларын гэрээг үзэглэхээр болсон байна.  
Айверсон шинэ багтайгаа энэ долоо хоногт багтаан гэрээгээ хийхээр төлөвлөж буй хэмээн эх сурвалж мэдээлжээ. Энэхүү гэрээний үндсэн заалт нь Айверсон нэг улирал тоглочихоод өөрөө гэрээгээ цуцалж болохоор бөгөөд NBA-ын аль нэг баг түүнийг сонирхсон тохиолдолд дуусгавар болох боломжтой юм.
Өдгөө 35 настай од тоглогч маань ирэх сарын 6-нд “Бешикташ”-ийн төлөө анхны тоглолтоо “Борнова” багийн эсрэг хийх төлөвтэй байгаа ажээ. Туркийн лигийн тэмцээн хэдийнэ эхэлсэн бөгөөд “Бешикташ” 1-1 гэсэн үзүүлэлттэй явж байна. Тэдний хувьд Туркийн сагсан бөмбөгийн түүхэн дэх шилдэг гурван багийн нэг юм.
Айверсоныг Хятадын лигийн багууд илүү сонирхон саналаа илгээж байсан ч тоглогч маань Истанбулыг илүүд үзжээ. Тэрээр NBA-д 14 улирлыг өнгөрөөхдөө гурван өөр багт тоглож байсан. Филадельф, Детройт, Мемфис хотын багт тоглож байсан тэрбээр 26.7 оноог дунджилсан тоглогч. Тус лигийн түүхэнд нэрээ тод үсгээр бичиж чадсан жижиг биет залуугийн шагналын цуглуулгад NBA-ын аваргын бөгж л байхгүй юм.

Score Studio