Монголын Хөрөнгийн бирж дээр өнгөрсөн долоо хоногт үнэт цаасны арилжаа таван удаа болж 36 компанийн 1.8 сая ширхэг хувьцааг 535.4 сая төгрөгөөр арилжсан байна. Топ-20 индекс 12973.46 нэгж байгаа нь өмнөх долоо хоногийнхоос 240.91 нэгжээр буюу 1.8 хувиар буурчээ. Индексийн сагсад багтах МЦХ /4.3 хувь/, Баянгол ЗБ /4.3 хувь/, Гермес центр /4.3 хувь/, БиДиСек /4 хувь/, Шивээ овоо /3.6 хувь/, УИД /3.4 хувь/, Таван толгой /3 хувь/, АПУ /1.8 хувь/, Говь /1.7 хувь зэрэг ХК-иудын үнэт цаасны ханш буурсан нь индексийн бууралтад нөлөөллөө.
Зах зээлийн нийт үнэлгээ 19 тэрбум төгрөгөөр буюу 1.6 хувь буурч, нэг их наяд 166.9 тэрбум төгрөг болсон байна.
Ханш нь өссөн үнэт цаасны тоонд Сүү /44.9 хувь/, Оллоо /31.9 хувь/, Монгол шилтгээн /20.2 хувь/, ханш нь буурсан үнэт цаасны тоонд Алмаас /15 хувь/, Мон ит булигаар /10 хувь/, Тавилга /7.4 хувь/ зэрэг үнэт цаас орж байна.
Нийт 36 үнэт цаас арилжигдсанаас 11 үнэт цаасны ханш өсч, 16 үнэт цаасны ханш буурч, есөн үнэт цаасны ханш тогтмол байлаа.
Тоо ширхгээр хамгийн олон ширхэг арилжигдсан үнэт цаасанд Хөх ган /1 сая ширхэг/, Хай би ойл /312.9 мянган ширхэг/, Гермес центр /203.8 мянган ширхэг/ ХК-ийн үнэт цаас орж байна.
Үнийн дүнгээр БиДиСек /160.9 сая/, Хөх ган /157.5 сая төгрөг/, Хай би ойл /54.1 сая төгрөг/ ХК-ийн үнэт цаас  арилжигдсан байна.