Эрчим хүчний зохицуулах газраас энэ оны гуравдугаар улиралд цахилгаан түгээх сүлжээнд гарсан цахилгаан хангамжийн тасалдлын судалгааг гаргажээ. Энэхүү судалгааг Төв, Баруун, Зүүн бүсийн нэгдсэн  сүлжээ  болон Даланзадгадын цахилгаан түгээх сүлжээний хүрээнд буюу тусгай зөвшөөрөл эзэмшигч 14 компанийн дүнгээр нэгтгэн  гаргасан байна. Энэ оны гуравдугаар улирлын цахилгаан тасалдлыг өнгөрсөн оны мөн үетэй харьцуулсныг доорхи хүснэгтэд үзүүлжээ.  

Сүлжээний бүсчлэл	2009 оны 3-р улирал			2010 оны 3-р улирал
	Исаиди	Исаифи	Икаиди	Исаиди	Исаифи	Икаиди
Төвийн бүс	2645	4.5	589	717	3.6	200
Баруун бүс	55373	5	11032	37448	5	7434
Зүүн бүс	6076	8.4	726	3537	2.2	1629
Даланзадгад	9447	10	913	9592	7	1353
Нэгдсэн дүн	5131	4.8	1067	2621	3.6	728

Энэ оны  гуравдугаар улиралд Төвийн бүсийн дүнгээр 717 минут буюу нэг хэрэглэгчид 12 цагийн тасалдал ногдож байгаа нь өмнөх оны мөн үетэй харьцуулахад 3.7 дахин багассан байна. Төвийн бүсийн томоохон цахилгаан түгээх компаниудын хувьд нэг хэрэглэгчид ногдох тасалдлын үргэлжлэх хугацаа өмнөх оноос мөн буурсан байна.

Баруун бүсийн хэмжээнд цахилгааны тасалдлын үргэлжлэх хугацаа 59 цаг болж өмнөх оны мөн үеэс 3.7 дахин, нэг хэрэглэгчид ногдож буй тасалдлын давтамж хоёр болж, өмнөх оноос дөрөв дахин буурсан гэжээ. Харин Даланзадгадын цахилгаан түгээх сүлжээний тасалдал өмнөх оны мөн үеэс нэмэгдэж 159 цаг болсон ч тасалдлын давтамж долоо болж буурчээ. Нийт дүнгээс харахад нэг хэрэглэгчид ногдох нийт цахилгааны тасалдлын 12 хувийг байгалын хүчин зүйлээс,  46 хувийг төлөвлөгөөт тасалдал, 20 хувийг цахилгаан түгээх компанийн шугам, тоноглолоос шалтгаалсан тасралтууд эзэлж байгаагаас гадна 12 хувийг бусад үйл ажиллагаанаас хамаарсан тасралт  эзэлжээ. Төвийн бүсийн хувьд нэг хэрэглэгчид ногдох тасалдалд цахилгаан түгээх компаниудын төлөвлөгөөт тасалдал 75 хувийг, түгээх сүлжээ болон тоног төхөөрөмжийн гэмтлээс шалтгаалсан тасалдал 28 хувийг эзэлсэн байна.

Д.Цээнэ