Сурлага, урлагийн амжилтаар үеийнхнээ тэргүүлсэн шилдэг гэх тодотголтой 35 оюутан өнөөдөр Ерөнхий сайдын нэрэмжит сургалтын тэтгэлгийг гардлаа. Нийт 35 оюутан энэхүү сургалтын тэтгэлэгт хамрагдлаа. Ерөнхий сайд С.Батболд оюутнуудад энэхүү шагналыг биечлэн гардуулав. Тэрбээр оюутан залууст хандан хэлсэн үгэндээ “Тухайн улсын хөгжил иргэн нь хэр өндөр боловсролтой, өрсөлдөх чадвар ямар байна вэ гэдгээс хамаардаг. Байгалийн баялаггүй хэрнээ өндөр хөгжилд хүрсэн улс олон бий. Тиймээс Монгол Улсын Засгийн газар боловсролын салбарт шинэчлэл хийхээр зорьж, зарим ажлыг эхлүүлсэн байгаа. Та бүхний хувьд бусдадаа мэргэжил, сурлагаар үлгэр дууриал болж, хүлээн зөвшөөрүүлнэ гэдэг нэн хариуцлагатай бас бахархалтай явдал. Цаашдын тань сурлага хөдөлмөрт амжилт хүсч, сайн сайхныг хүсэн ерөөе” гэсэн юм.

Энэ удаагийн сургалтын тэтгэлэгт МУИС, УБИС, ШУТИС, ЭМШУИС, Үйлдвэрлэл урлалын дээд сургууль зэрэг төрийн өмчит сургуулийн оюутнуудаас гадна Шихихутаг, Монгол бизнес, Утга зохиол нийгмийн ажилтны дээд сургууль, Зохиомж, Соёмбо зэрэг хувийн хэвшлийн дээд сургуулийн оюутнууд ч хамрагдлаа.

Г.Дарь