ХДХВ/ДОХ-ын вирус тээгч донорын цусыг  14 өвчтөнд сэлбэжээ гэх  мэдээллийг үндэслэлгүй, ташаа мэдээлэл хэмээн Эрүүл мэндийн яам, бусад холбогдох байгууллагын төлөөөлөл сэтгүүлчдэд хандлаа.  Хэвлэлийн хуралд ЭМЯ-ын Төрийн нарийн бичгийн дарга Н.Хүрэлбаатар, Нийгмийн эрүүл мэндийн бодлогын хэрэгжилтийг зохицуулах газрын дарга С.Төгсдэлгэр, ЭМЯ-ны Мэдээлэл хяналт шинжилгээ үнэлгээний газрын дарга С.Энхболд, ХӨСҮТ-ийн дэд  захирал Х.Сүрэнханд, ХӨСҮТ-ийн ХДХВ, ДОХ-ын Тандалт судалгааны албаны дарга н.Гантөмөр,  Цус судлалын үндэсний төвийн дарга П.Улаанхүү нар оролцож сэтгүүлчдийн асуултад хариулт өглөө. Тэдний хэлснээр ДОХ-ын вирус тээгч донорыг эрт үед нь илрүүлээд, эрүүл хүнд тухайн цусыг сэлбэхээс  өмнө таслан зогсоосон байтал хэвлэл мэдээллийн хэрэгслээр 14 хүнд ДОХ-ын вирустэй цусыг сэлбэсэн  гэх ор үндэсгүй зүйл нийтлэгдсэн гэж тайлбарласан юм. Харин сэтгүүлчид донор байсан хүнээс ДОХ-ын вирус илэрсэн байхад  дээрх мэдээллийг нуун дарагдуулж олон нийтэд мэдээлэхгүй байсан шалтгааныг лавлаж байсан юм. Түүнчлэн ДОХ-ын вирус тээгч донороос урьд өмнө нь авч басан цус үнэхээр  эрүүл гэх баталгаатай юу гэх асуулт анхаарал татаж байна. Энэ мэт асуудлаар холбогдох албаны хүмүүсээс зарим асуултад хариулт  авлаа.
-Донор хүнээс ДОХ-ын вирус хоёр сарын өмнө илэрсэн байхад мэдээллийг нуун дарагдуулж, олон нийтэд мэдээлэхгүй байх ямар шалтгаан байсан юм бэ?
Нийгмийн эрүүл мэндийн бодлогын хэрэгжилтийг зохицуулах газрын дарга С.Төгсдэлгэр: –ДОХ-ын халдвар тээгчийг илрүүлсэн талаарх мэдээллийг цаг тухайд нь мэдээлдэг. Гэхдээ энэ асуудалд Үндэсний аюулгүй байдал, хууль тогтоомж, хувь хүний эрхийн асуудал хөндөгддөг учир дэлгэрэнгүй мэдээлэх ёсгүй. Донор хүнээс  ДОХ-ын вирус илэрлээ гэж мэдээлэх албагүй.
-Одоо ДОХ-ын вирус тээгч  83 болсон. Дээрх донор хүний хувьд хэд дэхь тохиолдол болж бүртгэгдсэн бэ?
– Өнгөрсөн наймдугаар сард 80 дахь тохиолдол болж  бүртгэгдсэн. Гурав дахь жилдээ цусаа өгч байгаа хүн юм.
-Өмнө нь хэдэн удаа цусаа өгч байсан юм бол. Үнэхээр ДОХ-ын вирусгүй цус байсан гэх ямар баталгаа байна?
– Цус судлалын үндэсний төвийн дарга П.Улаанхүү: Тухайн донорын хувьд өмнө нь 10 гаруй удаа цусаа өгч байсан. Бид Донорыг цусаа өгөх болгонд шинжилгээнд хамруулдаг. Мөн тухайн дээжийг нэг жил хадгалдаг учир баталгаатай гэж хэлж чадна. Тэгээд ч цус сэлбүүлсэн хүмүүсийг шинжилгээнд хамруулахад эрүүл гэж гарсан. Манай улсад хэрэглэж буй тоног төхөөрөмж олон улсад хүлээн зөвшөөрөгдсөн учир тийм баталгаагүй бол болох үндэсгүй юм.