Үдээс өмнө хуралдаж эхэлсэн Байгаль орчин, хүнс, хөдөө аж ахуйн байнгын хорооны хуралдаанаар ганц хуулийн төсөл хэлэлцсэн ч хуралдаан сунжирч, үдээс хойш хүртэл үргэлжлэв. Хуралдаанаар Ан агнуурын тухай хуульд нэмэлт, өөрчлөлт оруулах тухай, Амьтны аймгийн тухай хуульд нэмэлт, өөрчлөлт оруулах тухай, Агнуурын нөөц ашигласны төлбөр, ан амьтан агнах, барих зөвшөөрлийн хураамжийн тухай хуульд нэмэлт, өөрчлөлт оруулах тухай хуулийн төслүүдийн анхны хэлэлцүүлгийг хийсэн юм.

Батлагдсанаас хойш ес гаруй жилийг үзсэн Ан агнуурын хуульд нэмэлт өөрчлөлт оруулахаас өөр аргагүй болсон тул ийнхүү төслийг хэлэлцэж байгаа аж. Байгаль орчны яамнаас “хамгаална гэдэг зөв ашиглалт” гэх бодлогыг баримтлан ан агнуурыг зүй зохистой ашиглах, хамгаалалтанд оруулах зохицуулалтыг нэмэлтээр тусгажээ. Тухайлбал, ан агнуурын бүс нутгийг тогтоож тухайн орон нутгийн иргэдийг зохион байгуулалтанд оруулан хамгаалуулж, ан агнуураас олох орлогоос нөхөрлөлийн үйл ажиллагаанд дэмжлэг үзүүлж байхаар тусгасан байна.

Хуралдаан сунжрах болсон шалтгаан нь хуралдаанд оролцогч гишүүдээс багагүй саналууд гарч, тухай бүрийг нь хэлэлцсэнтэй холбоотой юм.

Б.Мандах