Малайзын нийслэл Куала-Лумпур хотноо энэ сарын 13-16-ний өдрүүдэд Азийн спортын менежментийн зургадугаар их хурал амжилттай болж өнгөрлөө. Тус хуралд Азийн 13 орны, мөн гадаадын оюутан, судлаачид гээд 223 хүний бүрэлдэхүүнтэй оролцсон байна. Хурлын үеэр АНУ-ын их, дээд сургуулиудын эрдэмтэд, Шинэ Зеланд, Канадын эрдэмтэн судлаачид үндсэн илтгэлээ тавьсан бөгөөд Global Forum гэх чөлөөт хэлэлцүүлэг болж өнгөрчээ. Сүүлийн үед Ази тивийн орнууд дэлхийн тавцанд өндөр амжилт гаргах болсон бөгөөд цаашид энэ амжилтаа хадгалах, бататгах, ахиулах, тэргүүлэх зэрэгт хүрэх асуудал илтгэлийн гол сэдэв болж байв.
Хурлын үеэр мөн Азийн спортын менежментийн холбооны удирдах зөвлөлийн ээлжит хурал болж,  тус холбооны удирдлагыг шинээр сонгосон байна. Уг хуралд Азийн 13 орны хоёр, хоёр төлөөлөгч оролцсон бөгөөд манай улсаас Биеийн тамир, спортын газрын дэд дарга Д.Сүрэнхорлоо болон БТСГ-ын Гадаад харилцаа, мэдээлэл технологийн хэлтсийн дарга Н.Оюунбат нар оролцжээ.
Азийн спортын менежментийн холбооны ерөнхийлөгчийн сонгуульд Тайландын иргэн доктор Нейлман болон БТСГ-ын Гадаад харилцаа, мэдээлэл технологийн хэлтсийн дарга Н.Оюунбат нар өрсөлдөж, 8:7-гийн харьцаатай Тайландын иргэн олонхийн саналаар тус холбооны ерөнхийлөгчөөр сонгогдсон байна.
Дашрамд дурдахад, Азийн спортын менежментийн холбооны долдугаар хурал ирэх жил манай улсад болох ажээ.

Ш.Тэргэл