Нью-Йорк хотын Америкийн санхүүгийн музейд дэлхийд алдартай “Monopoly” буюу “Саятан” тоглоомыг цэвэр алтаар цутгаж, үнэт чулуугаар чимэглэн хийсэн хувилбарыг олон нийтэд дэлгэн тавьжээ. Үнэт эдлэл бүтээгч Сидней Мобелл энэхүү цэвэр алтан “Саятан” хөлөгт тоглоомыг бүтээхийн тулд бүтэн жилийн турш өдөр бүр уйгагүй хөдөлмөрлөсөн байна. Тоглоомын хөлөг нь 23 каратын алтан бүрмэл, жижиг байшин, зочид буудал, барилга байгууламжийг харин 18 каратын цэвэр алтаар цутгаж хийжээ. Байшингуудын яндан нь байгалийн цэвэр бадмаараг чулуун, харин зочид буудлын барилгын яндан нь индранил чулуун аж. Түүнчлэн тоглоомын шоонууд нь хүртэл цэвэр алтан бөгөөд шоон дээрх тоонуудыг алмаз эрдэнэ шигтгэн хийсэн байна.

Дэлхий дээрх хамгийн үнэтэйд тооцогдож буй энэхүү “Саятан” тоглоом 2 сая орчим ам.долларын хөрөнгөөр бүтжээ. Үүнийг 2012 оны аравдугаар сар хүртэл Америкийн санхүүгийн музейд дэлгэх юм байна.