Аврагдсан Чилийн уурхайчдын шуугиан намдаагүй байтал Хятадын уурхайчид тэдэнтэй ойролцоо сорилттой тулгарсан тухай мэдээ гарч эхэллээ. Хятадын төвийн бүсэд байх нүүрсний уурхайд осол гарч 26 хүн амь үрэгдсэн бөгөөд одоогоор 11 уурхайчин газар доор хоригджээ. Тэднийг аврахаас өмнө дэлбэрэлтийн үеэр бий болсон олон тонн нүүрсний тоосонцортой тэмцэх шаардлагатай байгаа тухай албаны эх сурвалжууд мэдээлж байна. Синьхуа агентлагт өгсөн мэдээллээр бол дэлбэрэлтийн үеэр 2500 орчим тонн хэмжээтэй нүүрсний тоос дэгдсэн гэж байгаа ба энэ тоосыг ямар нэг байдлаар зайлуулахгүйгээр газар доор хоригдсон уурхайчдад хүрэх боломжгүй гэж байгаа юм.

Мөн зарим эх сурвалжууд дараалан болж байгаа уурхайн эдгээр ослууд нь хаанахын уурхайн салбар хамгийн аюултай, эсвэл техникийн боломж сайтай болохыг харуулах жишээнүүд болно гэж мэдээлж байгаа гэнэ. Хятадын Хэнань мужид өчигдөр буюу бямба гарагийн өглөө эрт болсон энэ дэлбэрэлтийн дараа газар доор үлдсэн уурхайчдыг аврах ажилд 3-4 хоног зарцуулагдах бололтой гэж Хятадын радио мэдээлж байгаа юм. Хятад уурхайчдын нөхцөл байдал нэлээд хүнд байгаа бөгөөд тэднийн байгаа орчинд хорт хийн хэмжээ ихсэх аюултай байгаа гэнэ. Мөн хад чулуу нурах эрсдэл ч өндөр хэмээн мэдээлэгдэж байна. Энэхүү уурхай нь Хятадын  Pingyu Coal & Electric Co. Ltd компанийх бөгөөд хоёр жилийн өмнө мөн дэлбэрч байсан ба тэр үеэр мөн 20 гаран уурхайчин амь үрэгдсэн байна.