Витамин А, Е зэрэг хүний наслалтыг уртасгадаг антиоксидантыг хэрэглэх нь сайн хэдий ч бас сөрөг нөлөөтэй болохыг нэгэн шинэ судалгаагаар баталжээ. АНУ-ын хэвлэл мэдээллийн албаны мэдээлснээр “230 мянган хүнд хийсэн 67 судалгааны дүнд витамин хүний наслалтыг уртасгадаг гэдэг бол ташаа ойлголт” хэмээн мэдэгдэв. “Харин ч эсрэгээр витамин А болон Е үхэх эрсдэлийг нэмэгдүүлдэг байж болох юм” гэжээ. Хэдийгээр тийм боловч бусад эрүүл мэндийн мэргэжилтнүүд энэхүү судалгааны үр дүнг алдаатай цуурхал төдий, хүний бие организмд шаардлагатай нэмэлт бэлдмэлийг хэрэглэснээр гаж нөлөө үүсэхгүй гэсэн байна.
Нийт 232.550 хүн судалгаанд оролцсон бөгөөд антиоксидантын тунг өөр өөрөөр туршсан гэж шинжээчид хэлж байгаа юм. Антиоксидантуудыг тус тусад нь салгаж авч үзвэл витамин А16 хувиар, бэта-каротин долоон хувиар, витамин Е дөрвөн хувиар хүний үхэх эрсдэлийг нэмэгдүүлдэг гэнэ. Харин витамин С-гийн хувьд ямар нэгэн гаж нөлөө илрээгүй аж. “Biocare” фирмд өөрийн гаргаж авсан бэлдмэлийг нийлүүлдэг эм зүйч  Патрик Холфорд “Cochrane-ынхны энэхүү судалгаа бол шал дэмий зүйл. Антиоксидантууд шидэт үрэл биш, гэхдээ хүний амьдралын хугацааг богиносгох, эрүүл бус байдалд оруулах зүйл огтхон ч биш. Журмын дагуу зөв хэрэглэж, жимс, хүнсний ногооны агууламж ихтэй эрүүл хүнсээр хооллож, дасгал хийж, архи тамхи хэрэглэхгүй байвал антиоксидант бэлдмэлүүд эрүүл чийрэг амьдрахад ихээхэн үүрэг гүйцэтгэж чадна” хэмээсэн байна.

С.Цэлмэг