Цагдаагийн ерөнхий газрын даргын тушаалаар “ЗЭВСЭГ-2010” нэгдсэн арга хэмжээ уржигдраас эхэллээ. Энэ талаар Нийслэлийн цагдаагийн газрын Хэв журмын хэлтсийн Галт зэвсэг, тэсэрч дэлбэрэх бодисын зөвшөөрөл хариуцсан байцаагч, цагдаагийн дэслэгч А.Эрдэнэбатаас тодрууллаа. -Нийслэлийн хэмжээнд хэчнээн иргэн зөвшөөрөлтэйгээр галт зэвсэг эзэмшиж байгаа вэ?
-Нийслэлийн хэмжээнд 8670 гаруй галт зэвсэг бүртгэлтэй байна.
-Галт зэвсгийн бүртгэл жил бүр явагддаг уу?
-Галт зэвсэг эзэмшигч нь жил бүр галт зэвсгээ оршин суугаа газрын цагдаагийн байгууллагад бүртгүүлж, татвараа төлж, алдаж үрэгдүүлбэл 24 цагийн дотор цагдаагийн байгууллагад бүртгүүлэх учиртай.
-Сүүлийн үед галт зэвсэг авч яваад гэмт хэрэгт холбогдох нь ихэссэн. Ер нь ямар нөхцөлд галт зэвсгийг авч явахыг зөвшөөрдөг юм бэ?
-Галт зэвсгийг хот суурин газарт нийтийн тээврийн хэрэгслээр авч явахыг хориглодог. Агаарын хөлөг онгоц, усан онгоц, галт тэрэг, хот хоорондын нийтийн тээврийн хэрэгслээр авч явахдаа хөлгийн болон галт тэрэгний дарга, эсвэл жолоочид хадгалуулах ёстой. Ингэхдээ тухайн галт зэвсгийг гэрчилгээний хамт авч явж, аюулгүй байдлыг хангах үүднээс сумнаас тусад нь зориулалтын гэрэнд хийсэн байна.
-Буу, сум зарах зөвшөөрлийг хаанаас өгдөг вэ?
-Галт зэвсэг, сумыг нийтэд худалдах төв улсын хэмжээнд нэг байдаг. Тодруулбал, “Их ав” төв галт зэвсэг худалдаалах эрхтэй. Энэ төвд ангийн зориулалтын галт зэвсэг, сумыг нийтэд худалдах үйл ажиллагаа явуулдаг. Цагдаагийн ерөнхий газрын даргын тушаалаар “ЗЭВСЭГ-2010” нэгдсэн арга хэмжээний хүрээнд нийслэлийн хэмжээнд бүртгэлгүй байгаа галт зэвсгийг бүртгэж, гэрчилгээ олгох болно.
Б.ЦЭЦЭГДЭЛГЭР
Зохиогчийн эрх: "Улс төрийн тойм" сонин
