Улсын онцгой комиссын ээлжит хурал өнөөдөр болж Дорнод, Сүхбаатар аймагт гарсан мал, амьтны гоц халдварт шүлхий өвчний нөхцөл байдал, цаашид авах арга хэмжээний талаар  хэлэлцлээ.

Өнгөрсөн наймдугаар сараас хойш Улсын онцгой комисс шүлхийн асуудлаар зургаан удаа хуралдаж, шаардлагатай хөрөнгө мөнгийг Засгийн газрын хуралдаанаар тогтоол гарган шийдүүлж , зөвхөн энэ хоёр аймагт 2,6 тэрбум төгрөг зарцуулсан хэдий ч,  өвчний дэгдэлт дорвитой буурахгүй байгааг Монгол Улсын Шадар сайд, Улсын Онцгой комиссын дарга М.Энхболд комиссын гишүүдэд онцгойлон анхааруулж, зарим нэгэн хүмүүст хариуцлага тооцохоор болсон юм. Улсын онцгой комиссын өмнөх хуралдаанд Дорнод, Сүхбаатар аймгийн нийт 14 суманд шүлхий өвчин дэгдсэн мэдээлэл байсан бол энэ хурлаар Сүхбаатар аймгийн Баяндэлгэр, Түвшинширээт суманд шүлхий гарч, 16 суманд шүлхий өвчин тархсан гэсэн мэдээллийг албаны хүмүүс хийлээ. Шүлхий гарснаас хойш таслан зогсоох арга хэмжээг хангалтгүй зохион байгуулж байгааг Шадар сайд шүүмжлээд өнгөрсөн хурлын үеэр өгсөн үүргийг хангалтгүй биелүүлсэн Сүхбаатар аймгийн Засаг даргад хариуцлага тооцох асуудлыг Засгийн газрын хуралдаанаар шийдвэрлүүлэхээр боллоо.

Өнөөдрийн байдлаар Дорнод, Сүхбаатар аймгийн 16 суманд 768 өрхийн 31400 гаруй мал байгаагаас 20550 мал өвчилж, өвчний улмаас 20346-г нь устгажээ. Өвчний голомт бүхий бүсэд  1586 хүн, 64 мотоцикл,  296 автомашин, 45  ариутгалын цэг, 113 хөдөлгөөнт эргүүл ажиллаж байна гэсэн мэдээллийг Мал эмнэлэг, үржлийн газрын дарга Д.Оргил өглөө. Мөн тэрбээр шүлхий өвчний дэгдэлт татарч, буурах хандлагатай байгаа. Өмнөх өдрүүдэд хоногт 600 гаруй мал өвчилж байсан бол сүүлийн өдрүүдэд хоногт 200 орчим малд өвчний шинж тэмдэг илэрч байна гэсэн юм.

Гурван удаагийн нийлүүлэлтээр ирсэн нийт 1200 тун вакциныг Дорнод, Сүхбаатар, Дорноговь, Хэнтий аймгийн 13 суманд хуваарилж, 2,4 сая малыг вакцинжуулалтад хамруулжээ. Мөн өвчин гарсан аймгуудтай хил залгаа Хэнтий, Дорноговь, Говьсүмбэр, Төв аймаг болон Улаанбаатар хотын нийт 335 мянган бод мал, 7,1 сая бог малыг урьдчилан сэргийлэх үзлэгт хамруулан, хяналтад авсан байна.

Улсын онцгой комиссоос өгсөн чиг үүргийн дагуу Мал эмнэлэг, үржлийн газраас гадаад орон, олон улсын байгууллагад хандаж Монгол Улсад үүсээд байгаа нөхцөл байдалтай уялдуулан мал, амьтны гоц халдварт шүлхий өвчний эсрэг вакцин, шаардлагатай бусад барааг нийлүүлэх хүсэлт тавьснаас зарим орон, олон улсын байгууллага тодорхой санал ирүүлжээ. Тухайлбал, Олон улсын атомын энергийн байгууллага 500, БНХАУ 100 мянган тун вакциныг тусламжаар өгөх санал тавьсан байна. Мөн ОХУ 600 мянган тунг зохих үнээр нийлүүлэх боломжтой гэсэн хариу өгсөн талаар Мал эмнэлэг, үржлийн газрын дарга Д.Оргил тайлбар хийлээ.

Иймд өнөөдөр хуралдсан Улсын онцгой комиссын хурлаас ОХУ-аас нийлүүлэх 600 мянган тун вакцины үнэ, тээврийн зардал, гаалийн албан татварт зориулах хөрөнгө болон тусламжаар өгч буй вакциныг гааль, нэмүү өртгийн албан татвараас чөлөөлөх талаар асуудал боловсруулан Засгийн газрын хуралдаанаар хэлэлцүүлэхээр тогтлоо гэж Засгийн газрын Хэвлэл мэдээллийн албанаас мэдээллээ.