Инфляцийг бага байлгахын тулд ажилгүйдлийг ихэсгэдэг зарчим 1960-1970 оныг хүртэл үргэлжилсэн. Учир нь энэ үед Их Британийн эдийн засагч А.Филипсийн ажилгүйдэл, инфляци хоёр урвуу хамааралтай гэсэн онол үйлчилж байв. Үүнийг ажилгүйдэл их байх тусам хүмүүс ажил олгогчдын хэлсэн цалингаар ажиллана. Хэрэв ажилгүйдэл үгүй болчихвол ажил олгогч нар ажилчин олохын тулд өндөр цалин өгөхөд инфляци дагаж өсдөг хэмээн тайлбарлаж байсан. Тиймээс тухайн үед нэг бол ажилгүйдлийг, аль эсвэл инфляцийг сонгодог гэсэн ойлголт улс орнуудын дунд тархаад байсан гэхэд хилсдэхгүй. Харин 1970 онд ОПЕК анх үүсэхэд дээрх дүрэм зөрчигдөж, ажилгүйдэл, инфляци зэрэг өссөнөөр эдийн засагчид шинэ онол хайж эхэлсэн байна. Тухайн үед АНУ-ын эдийн засагч Эдмунд Фэлпс хүлээлтийн инфляци гэгч нэр томъёог гарган, төрийн зүгээс явуулж байгаа бодлогоос болж ажилгүйдэл, инфляци хоёр зэрэг өсч болно гэдгийг баталжээ. Түүний онолоор хөдөлмөрийн нөөцийг бүрэн ашигласан үед 10 хувийн ажилгүйдэл байх ёстой гэсэн байна. Тэрбээр үүнийг байх ёстой буюу хэвийн ажилгүйдэл гээд ийм хэмээний ажилгүйдэл байсан ч эдийн засаг тогтвортой байдаг гэжээ.
Монголд бүртгэлтэй 39 мянга гаруй ажилгүй хүн байдаг. Харин бодит амьдрал дээр 60 гаруй мянган ажилгүй хүн бий гэлцдэг. Фэлпсийн онолоор ийм хэмжээний ажилгүйдэл нь хэвийн ажилгүйдлийн хэмжээ, эдийн засагт нөлөөлөхгүй. Гэтэл Монголд инфляци, ядуурал газар авсаар байгааг ажилгүйдлийн түвшин өндөр байгаатай холбох нь хэвийн үзэгдэл болсон. Үүний учрыг хуралд суусан эдийн засагчид улс төрийн явцуу ашиг сонирхлоос болж хүлээлтийн инфляци хэт өндөр болсонтой холбож тайлбарласан юм. Монгол Улс эдийн засгийн дискрет буюу тэсэлгээт бодлогыг бус тууштай бодлогыг сонгох нь зөв гэдэгтэй танхимд байсан эдийн засгийн багш нар санал нэгдэж байлаа. Учир нь дискрет бодлого нь хямралын эсрэг бодлогуудыг цаг тухайд нь гаргадгаараа онцлог боловч Монгол шиг нэг ажил эхлэх гэж цаг хугацаа их алддаг улсад тохирохгүй аж. Монгол орны хувьд хямралын эсрэг бодлого нь хямрал илааршсан хойно батлагдаж, сэргэж яваа эдийн засгийг, улам хямруулдгийг тодотгож байсан. Зүй нь Монгол Улсын хувьд эдийн засгийн тууштай бодлогыг баримталж, Монголбанк нь Засгийн газраас хараат байж, мөнгөний бодлогоо олон нийтэд зарлан, юу ч болсон хэлсэндээ хүрч ажиллавал эдийн засаг тогтмолжих аж. Тухайлбал, инфляцийг тэдэн хувьд барина гэж зарлаад хэлсэндээ хүрч чадаж байвал олон нийт ч үйл хөдлөлөө түүнд нь тааруулдаг. Харин өнөөдрийнх шиг инфляцийг “буудах” бус “онилох” бодлого гаргачихаад онохгүй суугаад байвал олон нийтийн итгэл алдрахад хүрдэг байна. Тууштай бодлогыг явуулахдаа хамгийн чухал нь хэлсэндээ хүрэх хэмээн дахин дахин онцолж байлаа.
Энэ үеэр Санхүү эдийн засгийн дээд сургуулийн Эдийн засгийн тэнхимийн эрхлэгч Ц.Батсүрэн Монгол Улсын Төвбанк, төрийн бодлого хоёр нь ямар ч уялдаагүй байдгийг дурьдсан юм. Учир нь төрийн бодлогоор мөнгө олгох зэрэг инфляцийг хөөрөгдсөн бодлого гаргаж, Төвбанкнаас хэрэгжүүлэх мөнгөний бодлогыг нь уландаа гишгэдэг байна. Гэтэл улс төрийн бодлого эдийн засгийг хэлбэлзүүлдэг учир төвбанк нь Засгийн газраас хараат байх ёстой хэмээх эдийн засгийн онол амьдрал дээр хэдийнэ батлагдчихсан аж. Харин манайд Улс төрийн шийдвэрээс эдийн засаг хэрхэн хэлбэлзэх нь хамаардаг учир бүх юм уруугаа харсан байгааг ч ярьж байсан. Түүнээс цөөн асуултад хариулт авсан юм.
-Сая Монголд улс төрийн шийдвэрээс эдийн засаг хамаарч байна гэлээ. Гэтэл сүүлийн үед эдийн засагчид хэвлэл мэдээллийн хэрэгслээр байнга өөр өөр зүйл ярих болсон. Энэ нь ч гэсэн улс төрийн шийдвэр гаргах түвшнийхэнд нөлөөлдөг байх?
-Дэлхий нийтэд эдийн засгийн гурван онолыг баримтлагчид байна. Монголд ч мөн ялгаагүй сонгодог буюу либерал, Кейнс, Марксийн онолыг баримтлагчид байна. Үзэл баримтлалынхаа үүднээс зөрчилдөөнд хүрэх, улмаар улс төрийн шийдвэрт нөлөөлөх нь бий. Ер нь сүүлийн үед эдийн засгийн салбар моодонд ороод байгаа учир телевиз, сонины нүүрнээ эдийн засагчид залрах нь түгээмэл болсон. Тэдний ярихыг үгүйсгэх эрх байхгүй ч зөв юм ярьж байгааг нь түлхүү гаргах нь зүйтэй юм болов уу гэж боддог. Гэхдээ энэ тэр үзлийг баримтлагчид гэж хэлэх эрх надад байхгүй.
-Монголын эдийн засагчдын түвшинг тодорхойлооч?
-Хийх судлах зүйл их байгаа. Наад зах нь Алтан дүрмийн үеийн хадгаламжийн түвшинг тогтоох хэрэгтэй. Энэ нь олсон орлогынхоо хэдэн хувийг хадгалж, хэдэн хувийг хэрэглэхийг томъёоллын аргаар харуулахыг хэлдэг юм. Ингэснээр хувь хүн, улс орны эдийн засаг тогтвортой байх үндэс болдог. Жишээ нь, америкт л гэхэд орлогынхоо 0.25 хувийг хадгалж, үлдсэнийг нь хэрэглэхийг томъёолсон байдаг.
Р.САРАНГОО
Зохиогчийн ээрх: "Улс төрийн тойм" сонин