УИХ-ын Аюулгүй байдал, гадаад бодлогын байнгын хорооны дарга З.Энхболд тэргүүтэй төлөөлөгчид Бүгд найрамдах Болгар улсын Ардын Хурлын Гадаад бодлого, батлан хамгаалахын байнгын хорооны дарга Доброслав Димитровийн урилгаар тус улсад айлчлал хийгээд иржээ. УИХ-ын гишүүн Н.Батбаяр, Ц.Цэнгэл нар төлөөлөгчдийн бүрэлдэхүүнд орсон байна. Тэд Болгарын Ардын Хурлын дарга хатагтай Ц. Цачева, Гадаад бодлого, батлан хамгаалахын байнгын комиссын дарга Д. Димитров, Болгар-Монголын нөхөрлөлийн бүлгийн дарга, гишүүд болон тус улсын Гадаад хэргийн дэд сайд нартай уулзаж хоёр талын харилцаа, хамтын ажиллагааны талаар санал солилцоод иржээ.

УИХ-ын гишүүд БНБУ-ын Европын холбоонд элсэхийн тулд тус холбооны стандартыг хэрхэн нэвтрүүлж байгаа болон Сонгуулийн хуулийн талаар мэдээлэл сонсч, тус улсын шинжлэх ухаан технологийн ололтуудтай танилцсан байна. Улсын хилд шилэн кабель тавьж хамгаалдаг төхөөрөмж, судалгаа, мэдээллийн ажилд ашигладаг нисгэгчгүй онгоцны тухай мэдээллийг УИХ-ын гишүүд илүү сонирхож  судлахаар болжээ. Болгар улстай найрамдалт харилцаа тогтоосны 60 жилийн ой энэ жил тохиож байгаа бөгөөд хоёр тал эртний найрсаг харилцаа, эдийн засгийн шилжилтийн үеийг хамтдаа туулж байгааг онцлон ярилцсан байна.