Хүнс, хөдөө аж ахуй, хөнгөн үйлдвэрийн яамны Газар тариалангийн бодлогын хэрэгжилтийг зохицуулах газрын орлогч дарга Д.Есөн-Эрдэнээс ургац хураалтын ажил ямархуу байгааг тодруулсан юм. Тэрбээр “Энэ жил ургац хураалтын ажлыг идэвхжүүлэх, хүндрэл багатай явуулах үүднээс олон арга хэмжээ авсан. Техникийн шинэчлэл хийхэд улсын төсвөөс мөнгө зарцуулсан байгаа. Тариаланчдад комбайн өгсөн. Өнгөрсөн зургадугаар сард болсон хэт халалт, наймдугаар сард орсон хур тунадсаас болж үр тарианы болц бага зэрэг удааширч, зарим зүйл дээр зардлыг нэмэгдүүлсэн тал бий. Гэсэн хэдий ч ургац хураалт хэвийн үргэлжилж байна. Төлөвлөсөн хэмжээний ургацыг хураан авах боломжтой” гэсэн юм. ХХААХҮЯ-наас энэ жил Тариалан эрхлэлтийг дэмжих санд хөнгөлөлттэй зээлээр шатахуун олгосон. Үүнийг улсаас ургац хураалтын явц болоод тариаланчдыг олон талаар дэмжсэний нэг хэлбэр нь боллоо хэмээж байв. Тарьсан ургацаа хураах гэхээр хөрөнгө мөнгө, шатахууны хомсдолд орчихдог гээд олон төрлийн бэрхшээл тоочдог тариаланчид 30 хувийн урьдчилгаа мөнгө төлөөд 2000 тонн шатахуун авсан билээ. Харин зээлээр авсан бензинийхээ үлдсэн мөнгийг тариаланчид хураан авсан буудайгаараа төлөх ажээ.
Одоогийн байдлаар улсын хэмжээнд 82.3 мянган га талбайг ангилан хадаж, 75.1 га-г цайруулж, 145.9 мянган га талбайгаас шууд хураасан байдалтай байна. Улмаар нийт 227.8 мянган га талбайгаас 307.5 мянган тонн үр тариа, 149.2 мянган тонн төмс, 79.6 мянган тонн хүнсний ногоо, 31.1 мянган тонн тэжээлийн ургамал, 4.9 мянган тонн тосны ургамал тус тус хураан аваад байгаа аж. Тэгэхээр ургацын урьдчилсан балансыг гүйцээхийн улаанбуудайг л гэхэд үлдсэн га талбайгаас 30 гаруй мянган тонныг хураан авах шаардлага гарав бололтой. Харьцангуй бага талбайд тариалалт хийсэн Баян-Өлгий, Баянхонгор болон Сүхбаатар аймгийнхан ургацаа бүрэн хураан авчээ. Харин газар тариалангийн гол бүс нутаг Сэлэнгэ аймагт ургац хураалт 90 хувь, Төв аймагт 88.4 хувь, Булган аймагт 80.7 хувьтай үргэлжилж байгаа мэдээг ирүүлсэн байна. Энэ нь хамгийн сүүлийн үеийн буюу уржигдар ХХААХҮЯ-нд ирсэн мэдээ юм. Харин энэ сарын 15-ны дотор ургацаа бүрэн хураан авна хэмээн холбогдох хүмүүс нь тооцоолоод байгаа юм. Хэдийгээр мэргэжилтнүүд ургац хураалт хэвийн үргэлжилж байна хэмээж буй ч ойрын өдрүүдэд цаг агаар хүйтэрч, уулархаг нутгуудаар цас орох төлөвтэй байгаагаас үүдэн ургац хураалтыг яаравчлах шаардлагатай байгаа нь дамжиггүй. Зарим аймагт ургац хураалтын явц 60-70 хувьтай байгаа ажээ.
Ургац хураалтын явцыг тус, тусад нь тооцоолбол үр тарианых 89.6 хувь, төмс, хүнсний ногооных 92.7-93.5 хувьтай үргэлжилж байгаа. ХХААХҮЯ-аас ургац хураалтын явцыг өмнөх оны мөн үеийнхтэй харьцуулахад үр тариа 39.7 хувь, төмс, хүнсний ногоо 6.3-12.1 хувиар ахиу байна хэмээн мэдээлсэн. Энэ намрын ургацаас Тариалан эрхлэлтийг дэмжих сан 10.6 мянган тонн, гурил үйлдвэрлэгч компаниуд 40 мянга, нийтдээ 50.6 мянган тонн буудайг борлуулжээ.
Ургац хураалт иймэрхүү янзтай үргэлжилж байгаа аж. Энэ жилийн хувьд дэлхий дахинд үр тарианы хомсдол үүсээд байгаа. Манай улсад үр тариа, гурил экспортолдог ОХУ экспортдоо хориг тавьсан. Тиймээс манай улс хүссэн ч, хүсээгүй ч дотоодынхоо хэрэгцээг хангахаас өөр замгүй болж байгаа юм. ОХУ үр тариа, гурилын экспортдоо хориг тавьснаа мэдэгдсэний дараахан манай дотоодын гурил үйлдвэрлэгчид “Зах зээлийн ханш” гэдэг үгийг амны уншлага болгож үнээ чамгүй нэмээд авсан. Тэгэхээр энэ жил тэдэнд ОХУ-аас орж ирдэг хямд үнэтэй буудай, гурилаас болж үнээ буулгахын зовлон дахин нүүрлэхгүй болох нь мэдээж юм. Гурил үйлдвэрлэгчид 70 гаруй тонн улаанбуудай худалдан авах гэрээг хийгээд байгаа аж.
Манай улсын нэг жилийн дотоодын хэрэгцээт гурил 240 гаруй мянган тонноор хэмжигддэг. Харин дотоодын хэрэгцээг хангахад ойролцоогоор 420 мянган тонн улаанбуудай хэрэгтэй гэсэн тооцоо бий. Өнгөрсөн жилийн ургацаас нөөцөлсөн 28 мянган тонн буудай, 10 мянган тонн гурил байгаа билээ. Тэгэхээр өнгөрсөн жилийн нөөц, одоо хураагаад байгаа 307.5 мянган тонн буудай, үлдсэн 26 гаруй мянган га талбайгаас хураах улаанбуудайг нэмээд ирэх жил хэрэглэж, нөөцлөх улаанбуудай арайхийн бүрдэх бололтой. ХХААХҮЯ-ныхан энэ талаар “ОХУ-аас улаанбуудай, гурилын экспортдоо хориг тавьсан. Энэ нь манай улсад төдийлөн нөлөөлөхгүй байх. Ямар ч байсан хомсдол үүсэхгүй” хэмээх хариултыг өгөв
Энэ жилийн хувьд ХХААХҮЯ-наас улсын нөөцөд 80 мянган тонн буудай авах тооцоог гаргаад байгаа хэмээн тус яамны мэргэжилтнүүд хэлсэн юм. Гэхдээ энэ асуудлыг Засгийн газрын хуралдаанаар хараахан оруулаагүй байгаа бөгөөд бүрэн шийдэгдээгүй юм байна.
Т.УРАНГЭРЭЛ
Зохиогчийн эрх: "Улс төрийн тойм" сонин