Ардчилсан намын Ерөнхий на­рийн бичгийн дарга Д.Эрдэнэбат тэр­гүүтэй удирдлагууд өчигдөр сар бүр зохион байгуулдаг “4:11” хэв­лэлийн бага хурлаа хийв. Зуны гурван сар завсарлаж, нам тойрсон улс төрийн маргаанд тодорхой ха­риулт өгөхөөс түдгэлзэж байсан АН-ын Ерөнхий нарийн бичгийн даргын хувьд тэрбээр улс төрийн намуудын зөрчил, дотоод маргаантай холбоо­той асуудал намд бус, харин Улс төрийн намуудын тухай хуульд бай­гаа юм” гэж оношлоод байгаа аж. Учир нь Монголд үйл ажиллагаа явуулж буй улс төрийн нам ямар ч тохиолдолд Улс төрийн намуудын тухай хуульд захирагдаж, зүйл, заал­тынх нь хүрээнд үйл ажиллагаа явуул­даг. Гэтэл тэр хууль нь социа­лизмын үеийн улс төрийн намын агуулгаас нэг их хол зөрүүтэй биш бололтой. “Ардчилсан намыг хамтарсан Зас­гийн газраас гаргах ёстой” гэсэн гишүүдийнх нь байр суурийн талаар тод­руулсан сэтгүүлчийн асуултад Д.Эрдэнэбат “Манайх судалгаа хийж байгаа. Нэг хүн Засгийн газраас гарах ёстой, Засгийн газарт орох хэрэгтэй гэс­ний зоргоор шийднэ гэж байхгүй. Өнөө­дөр хамтарсан Засгийн газрын үйл ажиллагааны үр дүнг эхлээд тооцох ёстой. Тооцож үзээгүй байж юу ярих гээд байгаа юм бэ. Ма­най нам “Алтангадас”, Ардчилсан хүчний холбоо гэсэн хоёр фракцид хуваагдаад хоёр талд суучихсан юм биш. Энэ “өвчин” зөвхөн манай намд халдварлаагүй. Яагаад бусад намд бай­гаад байна гэдгийг ч олох ёстой. Ерөө­сөө Улс төрийн намуудын тухай хууль нь хуучин суурин дээр хийгдсэн уч­раас болохгүй байгаа юм. Улс тө­рийн намын дүрэм энэ хуульд захи­рагддаг. Тэгэхээр цаад уг үндсийг олж байж ярих хэрэгтэй” гэсэн ха­риултыг өгч байна билээ. Эндээс харахад Ардчилсан нам дотроо хэд хуваагдаж, гишүүд нь хэрхэн зөрчилдөж байсан ч энэ нь Улс төрийн намуудын тухай хуулийн буруу байж мэдэх нь. Дээр нь бүх нам “өвчтэй” байгаа. Шалтгаан нь бас л мөнөөх хууль.

Ардчилсан намын дарга хүсэхгүйдээ Үн­дэсний зөвлөлдөх хорооны хур­лыг зарлахгүй байгаа гэдэг намын­хаа гишүүдийн хардлагад “Ардчил­сан нам орон нутагт гишүүдийнхээ үгийг сонсохын тулд бүсийн уул­залт зохион байгуулж байгаа. Энэ сард Сүхбаатар аймагт зүүн бү­сийн уулзалт зохион байгуулна. Үүний дараа Үндэсний зөвлөлдөх хороо­ны хурлаа зарлана. Энэ хурлаар хам­тарсан Засгийн газрын үйл ажил­лагаанд үнэлэлт дүгнэлт өгч, хам­тарч байгуулсан гэрээний биелэл­тийг дүгнэнэ” гэсэн хариулт өгөв. Харин намын даргаа өөрчлөх, эсэх тухайд “Намын даргын асууд­лыг Үндэсний зөвлөлдөх хорооны хурлаар бус сонгуулийн үр дүнгээс  хамаарч ярьдаг. Иймд энэ асуудлыг Үндэсний зөвлөлдөх хорооны хур­лаар хаана” гэнэ билээ.

Нийслэлийн Ардчилсан на­мын даргын албыг аваад удаагүй байгаа Ш.Түвдэндорж дарга намдаа огцом шинэчлэл хийж, өнгөрсөн хуга­цаанд баримталж ирсэн буруу бодлогыг засч, засварлах төлөв­лөгөө боловсруулсан тухайгаа дуул­­гаад авсан. Түүний хувьд нийслэлийн Ардчилсан на­мын экс даргын хэрэгжүүлж байсан бодлогыг учир дутагдалтай хэмээн шууд утгаар нь дүгнэчихэж. Ул­маар “Одоо цоо шинэ бодлого тодорхойлж ажиллана. Өнгөрсөн 20 жилийн хугацаанд нийслэлийг нам яаж авч явав. Үүнийг өөрчилнө. Одоо сайн сайхан амьдралын төлөө ажиллана. Зам засвар, орч­ны бохирдол, хогийн асуудал, тө­рийн байгууллагын үйлчилгээ, ир­гэдийн аюулгүй байдал зэргээр нийслэлийн Ардчилсан на­маас төлөвлөгөө боловсруулж ажил­лана” гэдгээ дуулгасан юм.

Г.ОТГОНЖАРГАЛ

Зохиогчийн эрх: "Улс төрийн тойм" сонин