Монголын урчуудын эвлэлийн үзэсгэлэнгийн танхимд энэ сарын 1-7-ны хооронд МУЭ-ийн гишүүн зураач С.Ганболд, Ч.Алимаа нарын нэгэн гэр бүлийн уран бүтээлчдийн хамтарсан “Уран бүтээлийн үзэсгэлэн” үргэлжилж байна.

Зураач С.Ганболд, Ч.Алимаа нар нь дүрслэх урлагийн уран зургийн төрөлд хүч авьяасаа сорьж, өөрсдийн өвөрмөц арга барил, ур чадвараа шингээсэн олон арвин бүтээл хийж, тогтмол үзэсгэлэнд оролцон, үзэгчдийн хэдийнээ танил болсон авьяаслаг уран бүтээлчид юм.

Энэхүү үзэсгэлэн нь нэг гэр бүлийн хоёр уран бүтээлчийн хамтарсан анхны үзэсгэлэн бөгөөд сүүлийн жилүүдэд хийгдсэн 90 шахам уран зургийн бүтээлүүд нь дэлгэгдэж байгаагаараа онцлог юм.