Загварын ертөнцөд өөрийн гэсэн байр сууриа эзэлсэн Calvin Klein “CK One” нэртэй тансаг сүрчгийн брэндээ өргөжүүлэхээр шийдсэн тухай хэвлэлүүдэд мэдээлжээ. “CK One” нь худалдаанд гарсан эхний гурван сардаа л гэхэд 60 сая ам.долларын борлуулалт хийсэн аж. Зах зээлд амжилттай байгаа дээр нь үндэслэн уг брэнд зөвхөн сүрчиг биш жинсэн хувцас, эрэгтэй эмэгтэй дотуур хувцас, усны хувцас зэрэг бүтээгдэхүүн үйлдвэрлэн дараагийн хавар худалдаанд гаргахаар төлөвлөөд байгаа аж.

“CK One” загварын бүтээгдэхүүнүүд Calvin Klein-ы ижил төрлийн бүтээгдэхүүнээсээ 15-20 хувийн хямд үнэтэйгээр худалдаалагдах гэнэ. Учир нь залууст зориулсан өдөр тутмын хувцас гэдэг утгаараа өндөр үнээр зарахгүй байхыг зорьсон байна.
Мөн шинээр гарах тус загварын эмэгтэй дотуур хувцасны зар сурталчилгааны  нүүр царайгаар Samantha Gradoville ажиллахаар сонгогдсон байна. Харин бусад барааг зах зээлд төлөөлөхүйц шинэ өвөрмөц дүр төрх хайж байгаа тухай тус компанийн хэвлэлийн төлөөлөгч мэдээлсэн байна.