Ирэх оны гуравдугаар сараас эхлэн Кубын төрийн албан хаагчдын 500 мянга нь ажлаа орхих болсон нь эдийн засгийн тогтолцоогоо шинэчилж байгаа хэрэг мэт боловч үнэн хэрэгтээ ингэхээс өөр аргагүй байдалд хүрээд байгаа юм. Учир нь Кубын ажиллах хүчний зах зээлийн 85 хувь буюу таван сая гаруй хүн улсын байгууллагад ажилладаг. Тиймээс тэдний цалин хөлсийг төсвийн хөрөнгөнөөс гаргаж өгнө. Харин өнгөрсөн дөрөвдүгээр сард тус улсын Ерөнхийлөгч Раул Кастро төрийн байгууллагынхны дунд сая гаруй хүн ямар ч ажлын бүтээмжгүй хөдөлмөр эрхэлж байгааг онцлон дурдсан. Тиймээс тэднийг цомхотгох нь улс орны эдийн засгийг урагшлуулахад нэг том алхам болно хэмээн мэдэгдсэн билээ. Түүний энэ мэдэгдлийн дараагаас ард иргэдийнх нь дунд “ажлаа алдах нь” гэх болгоомжлол бий болсон нь дамжиггүй юм. Гэхдээ шинжээчдийн үзэж буйгаар энэ нь энгийн иргэдийн хувьд хувийн бизнесээ цэцэглүүлж, амьжиргаагаа дээшлүүлэх боломж билээ. Албан ёсны мэдээ баримтад дурдсанаар Кубэд 143 мянган хүн хувиараа ажил эрхэлдэг хэмээн бүртгүүлжээ. Гэхдээ албан бус мэдээгээр бол энэ тоо дор хаяж гурваас дөрөв дахин үржигдэх юм. Хүмүүс ажил эрхлэлтийн байдлаа нууж байгаа нь хэд хэдэн шалтгаантай. Юуны өмнө татвар төлөхөөс зайлсхийх болон Засгийн газар тусгай зөвшөөрөл бараг олгодоггүйтэй холбоотой аж. Өөрөөр хэлбэл, Кубэд хар зах хөгжсөн гэсэн үг юм. Гадны валют руу хөрвөх чадваргүй Кубын песогоор тус улсын иргэд арилжаа хийдэг. Харин хар зах дээр бол тэдгээрийг хөрвөгч валютаар сольж, гадны бараа бүтээгдэхүүн худалдан авах боломжтой болж байгаа юм.
Р.Кастро 2008 оны хоёрдугаар сард Ерөнхийлөгчөөр сонгогдсоныхоо дараагаас улс орондоо эдийн засгийн шинэчлэл хийхийг оролдсоор ирсэн билээ. Тэрбээр 2008 оны есдүгээр сард төрийн мэдэлд байдаг 2.5 сая акр газрыг өөрсдөө газар тариалан эрхлэхийг хүссэн фермерүүдэд олгожээ. Түүнчлэн 110 мянган фермер газар боловсруулж, үр тариа тариалах боломжтой болсон юм. Кубын Засгийн газар хүнсний бүтээгдэхүүний импортод зөвхөн өнгөрсөн онд л гэхэд 100 сая ам.доллар зарцуулсан аж. Фермерүүдэд газар олгосноор энэ зардлаа бууруулах боломжтой хэмээн тус улсын эдийн засагчид тооцож байгаа юм. Кубын төрийн мэдлийн “Гранма” сонинд өнгөрсөн сарын 24-нд мэдээлснээр тус улс автомашины засварчин, мужаан, массажчин, хүүхэд асрагч, үйлчлэгч зэрэг 178 төрлийн ажил, мэргэжлийг хүлээн зөвшөөрч, хуулиар баталгаажуулсан байна. Иймэрхүү замаар хувиараа ажил эрхлэх боломжийг нэмэгдүүлж, нийгмийн халамжид зарцуулах төсвийн зардлаа танах аж. Кубын Сангийн сайд Марино Марилло Жорж өнгөрсөн баасан гарагт “Хэдийгээр хувийн секторыг дэмжиж байгаа ч ойрын таван жилдээ бөөний худалдааг хөгжүүлэхгүй” хэмээн мэдэгджээ. Зарим ажиглагчийн үзэж буйгаар бөөний худалдааг дэмжихгүй юм бол хувийн сектор хөгжих ямар ч боломжгүй юм. Тиймээс Кубын Засгийн газар эдийн засгийн шинэчлэл хийхээр зориглосон л бол дорвитойхон шиг хийх хэрэгтэй гэж үзэж байна.
Ах дүү Кастрогийн хувьд шинэчлэл хийж буй явдал анхны тохиолдол биш юм. Тэртээх 60-аад оны үед цалин хөлсөнд зарцуулах төсвийн хөрөнгийн хэмжээг бууруулах зорилгоор эдийн засгийн тогтолцоондоо өөрчлөлт хийж, хөдөө аж ахуй, хувийн секторыг дэмжиж байсан. Харин 90-ээд онаас гадны хөрөнгө оруулалтыг зөвшөөрч эхэлсэн юм. Олон улсын ажиглагчдын үзэж байснаар тухайн үед Фидель Кастро Хятад, ЗХУ хоёрын алиных нь загвараар шинэчлэл хийх вэ гэдгийг сонгох шаардлагатай болжээ. Ф.Кастро Зөвлөлт засгийг дууриахаар шийдвэрлэсэн. Гэвч америкчуудыг баярлуулсан М.Горбачёвийн шийдвэр Оросын социалист системийг нураасан билээ. Энэ үед улс төрийн нөхцөл байдлын хувьд социализмыг хадгалсан хэрнээ эдийн засгийн хувьд капитализмтай нөхөрлөсөн Хятадын талаарх дүгнэлт нь Ф.Кастрод тийм ч их таалагдаагүй гэхэд болно. Гэвч одоо сард 20 ам.долларын цалин авч, төрийн байгууллагад насаараа ажиллах хувь тавилантайгаа кубчууд эвлэрвэл энэ улсын эдийн засаг нэг их хол явахгүй гэдэг нь ойлгомжтой болсон. Тиймдээ ч Кубын Засгийн газар Хятадын эдийн засгийн шинэчлэлийг дууриахын тулд алсуур бөгөөд алгуурхан хөдлөж эхэлжээ. Гэхдээ одоогийн байдлаар хувийн секторыг дэмжихийн тулд Засгийн газраас тодорхой хөрөнгө гаргах нь зайлшгүй байгаа юм. Төсвийн зардал нь хэрээс хэтрээд байгаа тус улсын хувьд цаад санхүүжүүлэгчээр нь АНУ “ажиллаж” байж ч мэдэх юм хэмээн зарим шинжээч дүгнэжээ. Тус улсын хувьд Кубтэй харилцаагаа сайжруулах нь “Америк мөрөөдөл”-ийнх нь нэг хэсэг гэж үзэх хүн ч байна. АНУ Кубтэй хийх худалдаандаа хориг тавьсан учраас тус улсад Кубээс ирэх цагаачлалыг дэмждэггүй. Харин хоёр орны харилцаа сайжирвал Америк руу гарч, ажил эрхлэн ар гэрээ тэжээх сонирхолтой кубчуудын тоо цөөнгүй байдаг аж. Энэ нь зарим талаараа хувийн секторыг хөгжүүлэх гол санхүүжилт болно гэж үзэх эдийн засагчид байгаа юм. Нөгөө талаас АНУ-ын хувьд одоо худалдааны хоригоо цуцалчихвал Кубын зах зээлд нэвтэрч, тэнд дураараа тоглох боломжтой болж байна.
Т.ЭЛИСА
Зохиогчийн эрх: "Улс төрийн тойм" сонин