17 дугаар байрны оршин суугч Д.Баяр: Урьд нь байсан тоглоомын талбай тийм ч муу биш байсан. Гэхдээ энэ танилцуулгаар бол их л аятайхан сагсны талбайтай болох бололтой. Хэрэв энэ танилцуулга дээрх үнэн бол шүү дээ. Ер нь сүүлийн үед компаниуд ямар нэг газрыг авахдаа анхандаа ийм ч юм барина, тийм ч юм барина гэж байгаад нэг л өглөө босоод ирэхэд нь өөр зүйл барьчихсан байдаг жишиг тогтоод удлаа. Сайн итгэж өгөхгүй л байна. Цаашид юу болохыг харж л байя.
Тухайн орон сууц хавийн хүүхдийн тоглоомын талбай СӨХ-ны мэдлийнх байдаг. Тиймээс энэ талбай дээр баригдаж байгаа гэгдэх тоглоомын талбайн талаар “Булаг” СӨХ-ны дарга Д.Орломжав ямар мэдээлэлтэй байгааг сонирхсон юм.
-Шинээр тоглоомын талбай барьж байгаа газар танай СӨХ-нд харьяалагддаг уу?
-Тийм. Орон сууцнуудын ойр хавийн нийтийн эзэмшлийн талбайнуудыг “орчны газар” гэж нэрлэдэг. “Орчны газар”-уудыг хотын даргатай гэрээ хийсний үндсэн дээр СӨХ-нд өмчлүүлдэг. Манай СӨХ хотын даргатай гэрээ хийж, ойр хавийн нийтийн эзэмшлийн газруудыг кадастрын зураглалд оруулж, өөрийн эзэмшлийн болгож авсан.
-Танай мэдлийн газарт байсан хүүхдийн тоглоомын талбайг “Смарт өргөө” ХХК шинэчлэх гэж байгаа юм байна. Та бүхэн үүнийг шалгасан уу?
-Манай хорооны 25 жилийн ойг тохиолдуулан дүүргийн Засаг даргын санаачилгаар энэ ажил эхэлсэн. Бид Засаг даргадаа итгэхгүй бол болохгүй биз гэж бодоод анхнаасаа ямар нэгэн хардлагагүй талбайгаа найр тавин хүлээлгэж өгсөн. Одоо барилгынх нь ажил эхлээд явж байна. Үнэн байх л гэж найдаж байгаа.
-Барилгын суурь цутгаад байгаагаа хэрхэн тайлбарласан бэ?
-Сагсан бөмбөг тоглох орчин үеийн талбай барих учир суурь цутгах шаардлагатай байгаа гэсэн.
“Смарт өргөө” ХХК нь Өмнөд Солонгосын 25 хувийн хөрөнгө оруулалттай компани аж. Энэхүү талбайг тохижуулах саналыг Баянзүрх дүүргийн Засаг дарга Б.Батзориг “Смарт өргөө” ХХК-ийн захирал Б.Дайчинхүүд тавьжээ. Тохижилтын санхүүжилт болох 120 гаруй сая төгрөгийн 25 сая төгрөгийг нь Баянзүрх дүүргийн Засаг даргын Тамгын газар гаргаж, үлдсэнийг нь “Смарт өргөө” ХХК санхүүжүүлж байгаа аж. Гол нь Баянзүрх дүүргийн зургадугаар хорооны нутаг дэвсгэрт байх оюутны хотхны дундах талбайг нэг шөнө нүхэлсэн хэргийн эзэн нь “Смарт өргөө” ХХК аж. Энэхүү газарт оюутнуудад зориулсан спорт цогцолбор барина хэмээж байсан боловч МОХ-ны эсэргүүцэлтэй тулсны улмаас үйл ажиллагаа нь зогссон. Ийнхүү “Смарт өргөө”-гийнхөн Баянзүрх дүүргийн нутагт өөрийн хөрөнгөөр тохижилт хийгээд байгаа нь олон хүнд газрын асуудалтай холбоотой гэсэн сэжиг төрүүлэх болжээ.
Тиймээс Баянзүрх дүүргийн Засаг дарга Б.Батзориг “Смарт өргөө” ХХК-ны Б.Дайчинхүү нар ямар холбоотой болохыг “Смарт өргөө” компанийн захирлаас асуусан юм.
-Танай компани хөрөнгө гарган Баянзүрх дүүрэгт хоёр ч газарт спортын цогцолбор барихаар болсон байна. Өглөгийн цаана авлага заавал байдаг. Баянзүрх дүүргийн Засаг даргатай ямар нэгэн тохиролцоонд хүрсний үндсэн дээр энэ бүхнийг хийж байна гэж хардах хүмүүс олон байна. Тухайлбал газар авахаар тохирох ч юм уу?
-Баянзүрх дүүргийн Засаг дарга Б.Батзориг бидэнд санал тавьсан. Ямар ч газар бидэнд ийм санал тавихад бид хүлээж авна. Манай компани сагсны талбайн резинэн шал үйлдвэрлэж байгаа. Мөн урд хөршөөс хүүхдийн талбайн тоглоом оруулж ирдэг. Тиймээс л энэ бүхнийгээ танилцуулах гэж үүнийг хийж байна. Нэг ёсондоо амталгаат худалдаа гэх үү дээ. Энэ бүхний цаана газрын наймаа байна гэх мэт хардлага үүсч байгаа нь үнэн. Гэхдээ бид газар авахаар байсан бол энэ бүхэнд зарцуулж байгаа мөнгөө ямар нэг албан тушаалтанд өгчихөд л хангалттай байсан шүү дээ. Та нар судлаад үзвэл Баянзүрхийн нутагт манай компани ямар ч газаргүй болохыг тогтоох байх.
С.САРАНГОО
Зохиогчийн эрх: "Улс төрийн тойм" сонин