УИХ-ын Тамгын газраас ирэх долоо хоногт хуралдах ажлын хэсэг, байнгын хороо, чуулганы нэгдсэн хуралдааны хуваарийг гаргаад байна. Тодруулбал, энэ сарын 4-нд буюу ирэх даваа гаригт УИХ дахь МАХН-ын бүлэг “А” танхимд, УИХ дахь Ардчилсан намын бүлэг “Б” танхимд 10.00 цагаас хуралдах аж. Мөн өдөр ажлын хэсгийн хуралдаанууд болох юм байна. Төрийн байгуулалтын байнгын хорооны ажлын хэсгийн хуралдаан 14.30 цагт эхэлж,  Монгол Улсын Үндсэн хуульд нэмэлт, өөрчлөлт оруулах журмын тухай хуулийн төслийг авч хэлэлцэнэ. Мөн цагт УИХ-ын Хууль зүйн байнгын хорооны хуралдаан болж,  Монгол Улсын Засгийн газраас 2006 оны арванхоёрдугаар сарын 19-ний өдөр, УИХ-ын гишүүн Ж.Сүхбаатар, Б.Бат-Эрдэнэ, Х.Жекей нараас 2010 оны дөрөвдүгээр сарын 19-ний өдөр тус тус Улсын Их Хуралд өргөн мэдүүлсэн Захиргааны хэрэг хянан шийдвэрлэх тухай хуульд нэмэлт, өөрчлөлт оруулах тухай хуулийн төслүүдийг авч хэлэлцэх аж.

Харин мягмар гариг буюу энэ сарын 5-нд УИХ-ын Төрийн байгуулалтын байнгын хороо 09.30 цагаас хуралдаж, УИХ-ын хаврын чуулганы завсарлагааны хугацаанд хийж гүйцэтгэсэн ажлын дүн, намрын чуулганаар хэлэлцэх асуудлын талаар санал солилцох юм байна.

Лхагва гаригт 09,30 цагт УИХ-ын Нийгмийн бодлого, боловсрол, соёл шинжлэх ухааны байнгын хороо хуралдаж, Хөдөлмөр эрхлэлтийг дэмжих тухай хуулийн шинэчилсэн найруулгын төсөл, Мэргэжлийн боловсрол, сургалтын тухай хуулийн зарим заалтыг хүчингүй болсонд тооцох тухай, Хөдөлмөр эрхлэлтийг дэмжих тухай хуулийг хүчингүй болсонд тооцох тухай хуулийн төслүүдийн хэлэлцэх эсэхийг шийдвэрлэх юм байна. Мөн Монгол Улсын иргэн гадаадад, гадаадын иргэн Монгол Улсад хөдөлмөр эрхлэх тухай, Ашигт малтмалын тухай хуульд өөрчлөлт оруулах тухай, Гаалийн тариф, гаалийн татварын тухай хуульд нэмэлт, өөрчлөлт оруулах тухай, Аж ахуйн үйл ажиллагааны тусгай зөвшөөрлийн тухай хуульд өөрчлөлт оруулах тухай, Ажиллах хүч гадаадад гаргах, гадаадаас ажиллах хүч, мэргэжилтэн авах тухай хуулийг хүчингүй болсонд тооцох тухай хуулийн төслүүдийн хэлэлцэх эсэхийг шийдвэрлэх аж.

УИХ-ын Хууль зүйн байнгын хороо 14.30 цагаас хуралдаанаа эхлүүлж, Тусгай хяналтын дэд хорооны санал, дүгнэлтийг сонсож, Улсын ерөнхий прокурорын саналыг үргэлжлүүлэн хэлэлцэх юм байна.

Түүнчлэн Улсын дээд шүүхийн шүүгчийг УИХ-д танилцуулах, бусад гэсэн бас бус асуудлууд багтжээ.

Пүрэв, баасан гаригуудад УИХ-ын чуулганы нэгдсэн хуралдааныг хуралдуулахаар товлосон байна. Түүгээр Хөдөлмөр эрхлэлтийг дэмжих тухай хуулийн шинэчилсэн найруулгын төсөл, Мэргэжлийн боловсрол, сургалтын тухай хуулийн зарим заалтыг хүчингүй болсонд тооцох тухай, Хөдөлмөр эрхлэлтийг дэмжих тухай хуулийг хүчингүй болсонд тооцох тухай хуулийн төслүүд хэлэлцэх эсэх, Монгол Улсын иргэн гадаадад, гадаадын иргэн Монгол Улсад хөдөлмөр эрхлэх тухай, Ашигт малтмалын тухай хуульд өөрчлөлт оруулах тухай, Гаалийн тариф, гаалийн татварын тухай хуульд нэмэлт, өөрчлөлт оруулах тухай, Аж ахуйн үйл ажиллагааны тусгай зөвшөөрлийн тухай хуульд өөрчлөлт оруулах тухай, Ажиллах хүч гадаадад гаргах, гадаадаас ажиллах хүч, мэргэжилтэн авах тухай хуулийг хүчингүй болсонд тооцох тухай хуулийн төслүүд хэлэлцэх эсэх асуудлыг авч хэлэлцэнэ.
Мөн Ерөнхий сайдын мэдээллийг сонсох юм байна.

Г.Дарь