Энхийг дэмжих ажиллагаанд оролцох эрх зүйн үндсийг шинэчилнэ

Хуучирсан мэдээ: 2010.03.23-нд нийтлэгдсэн

Энхийг дэмжих ажиллагаанд оролцох эрх зүйн үндсийг шинэчилнэ

УИХ-ын гишүүн Р.Амаржаргал, Я.Батсуурь, Х.Жекей, Ц.Шинэбаяр, З.Энхболд нар Цэрэг, цагдаагийн албан хаагчийг НҮБ-ын энхийг сахиулах болон олон улсын бусад ажиллагаанд оролцуулах тухай хуулийн шинэчилсэн найруулгын төсөл санаачлан боловсруулснаа УИХ-ын дарга Д.Дэмбэрэлд өнөөдөр өргөн барилаа.

     Цэрэг, цагдаагийн албан хаагчийг НҮБ-ын энхийг сахиулах болон олон улсын бусад ажиллагаанд оролцуулах тухай хуулийг 2002 онд баталснаас хойших хугацаанд Монголын зэвсэгт хүчний бие бүрэлдэхүүн НҮБ-ын энэ чиглэлийн үйл ажиллагаанд нийтдээ 10 удаа оролцож, давхардсан тоогоор зэвсэгт хүчний 3479 албан хаагч үүрэг гүйцэтгэжээ. Манай зэвсэгт хүчнээс энхийг дэмжих ажиллагааанд оролцох цар хүрээ, тоо хэмжээ ийнхүү нэмэгдсэн, сүүлийн жилүүдэд аюулгүй байдлыг хангах чиг үүрэг бүхий бусад байгууллагын албан хаагчид энэ үйл ажиллагаанд оролцдог болсон, түүнчлэн энхийг дэмжих ажиллагаанд оролцохтой холбогдож гарах зардлыг хуулиар тогтоох, оролцох бие бүрэлдэхүүний эрх зүйн байдлыг тодотгох шаардлагатай болсон зэргээс үүдэж эрхэм гишүүд хуулийн шинэчилсэн найруулгын төслийг боловсруулжээ.

    Төсөл санаачлагчид хуулийн нэрийг Энхийг дэмжих ажиллагаанд оролцох тухай гэж өөрчлөх, зөвхөн зэвсэгт хүчин биш тагнуул, онцгой байдлын болон шүүхийн шийдвэр гүйцэтгэх асуудал эрхэлсэн байгууллагын бие бүрэлдэхүүнийг бас оролцуулах, эдгээр бие бүрэлдэхүүнийг энхийг дэмжих ажиллагаанд оролцуулахтай холбогдсон санхүүгийн нөөцийг жил бүрийн улсын төвлөрсөн төсөвт тусган батлуулж байх, үүрэг гүйцэтгэх бие бүрэлдэхүүн нь гэнэтийн ослын даатгалд заавал даатгуулсан байхаар тусгасны дээр зэвсэгт хүчнийг энэхүү ажиллагаанд оролцсон тохиолдолд гүйцэтгэх үүргийг шинэчлэн тодорхойлсон байна гэж УИХ-ын Хэвлэл мэдээлэл, олон нийттэй харилцах хэлтэс мэдээлэв.           

NewsMN Гар утасны хувилбар Татах
NEWS.mn

Мэдээллийн эх сурвалж