Үндэсний аюулгүй байдлын зөвлөлийн төсвийн ерөнхий менежер, ажлын албаны дарга Б.Хурцыг Лондонгийн цагдаа нар саатуулсан шалтгааныг албаныхан 19 хоногийн дараа тодруулжээ. Монгол Улсын үндэсний аюулгүй байдлыг хариуцан ажилладаг албан тушаалтан хилийн чанадад багагүй хугацаанд саатуулах байранд сууж байгаа талаарх мэдээлэл хэвлэлд гарсны дараа  холбогдох  албан тушаалтнууд “Яав, ийв” болон бужигнав. Гадаад харилцааны яамны Консулын газрын захирал Д.Ганхуяг уржигдар “Манайд Б.Хурцыг баривчилсан талаар ямар ч мэдээлэл алга. Лондонгийн Элчин сайдын яаманд ч тодорхой мэдээлэл байхгүй гэсэн. Одоо Лондонд шөнө болж байгаа. Цагийн зөрүү гарахаар тодруулж асуугаад мэдээлэл өгье” гэж байсан. Тэрбээр өчигдөр мэдээлэл өгөхөөс эрс татгалзлаа. Учир нь Лондонд болсон явдлыг нууцын зэрэглэлд хадгалахыг хэн нэгэн албан тушаалтан Гадаад харилцааны яамныханд даалгасан аж. Д.Ганхуяг дараах хариултыг өглөө.

-Та Лондонд болсон явдлыг тодруулсныхаа дараа тодорхой мэдээлэл өгнө гэсэн. Лондон дахь Элчин сайдын яамнаас тодорхой мэдээлэл ирсэн үү?

-Бид холбогдох мэдээллүүдийг авсан. Б.Хурцыг саатуулсан нь үнэн. Гэхдээ тодорхой мэдээлэл өгч болохгүй байна.

-Яагаад?

-Хэсэг хугацааны дараа хэвлэлийн бага хурал зарлаж энэ талаар мэдээлэл хийнэ. Мэдээлэл өгч болохгүй гэх шалтгааныг тайлбарлах боломжгүй.

-Б.Хурцыг эх оронд нь авчрах боломж бий юү. Эсвэл хэргийг нь шийдтэл саатуулах ёстой юу?

-Ямар хэрэгт холбогдсоноос л шалтгаална гэв.

Монголын хууль хяналтынхан Б.Хурцыг саатуулахад огт оролцоогүй аж. Тодруулбал, Б.Хурцад холбогдох авлигын хэргийг прокурор хэрэгсэхгүй болгосон. Тиймээс Б.Хурц сэжигтэн, яллагдагчийн бүртгэлд байхгүй нэгэн аж. Эх сурвалжууд түүнийг Лондонгийн хууль зөрчсөн гэж таамаглаж байна. Харин Цагдаагийн ерөнхий газрын Интерполын товчооныхон “Мэдээлэл өгөх боломжгүй” гэсэн хариугаа хоёр өдөр давтлаа.

Б.Хурцын эхнэр гадаад руу ажлаар яваад удаагүй байгаа аж. Гэхдээ хаашаа, ямар ажлаар явахаа хамт олондоо дуулгалгүй гэнэт явжээ.   Тэгэхээр нөхрөө харьд саатуулсныг сонсоод араас нь явсан байх магадлалтай. Эхнэр нь түүнийг Лондонгийн саатуулах байранд байгааг мэдээд явсан бол Үндэсний аюулгүй байдлын зөвлөл, Гадаад харилцааны яамныхан энэ талаар сонсоогүй байна гэдэг эргэлзээтэй. Мөн Б.Хурц энэ сарын 17-ны баасан гарагт Лондон руу ниссэн нь албан томилолт биш бололтой. Эх сурвалжийн мэдээлснээр, Б.Хурц ганцаараа явсан аж. Хэрвээ ажлын томилолтоор явсан бол Монгол Улсыг төлөөлж байгаа Консулын газарт албан ёсоор бүртгүүлэх учиртай. Харин Б.Хурц Консулын газарт бүртгүүлээгүй аж.

Б.Цэцэгдэлгэр

Зохиогчийн эрх: "Улс төрийн тойм" сонин