Монгол Улсад Терроризмтой тэмцэх ажиллагааг зохицуулах зөвлөлөөс саяхан Ховд аймагт “Террорист халдлагын үед орон нутагт шуурхай штабыг зохион байгуулах нь” сэдэвт баруун бүсийн сургалт, дадлагыг зохион явууллаа. Энэхүү сургалт, дадлага нь болзошгүй аюулын үед аймгийн шуурхай штабыг идэвхжүүлэх талаар өгсөн онолын мэдлэгийг практиктай хослуулснаараа ач холбогдолтой юм байна.

Террорист халдлагын үед барьцаалагдсан иргэдийг чөлөөлөх шуурхай штабын дадлагын үйл ажиллагааг Ховд аймгийн Засаг дарга, аймгийн Терроризмтой тэмцэх ажиллагааг зохицуулах салбар зөвлөлийн дарга Г.Нямдаваа удирдан явуулж, дадлагад Зэвсэгт хүчний 123 дугаар анги, цагдаа, онцгой байдал, эмнэлгийн орон нутгийн томилгоот бүлгүүд оролцжээ.

Сургалтад Ховд, Баян-Өлгий, Увс, Завхан, Говь-Алтай аймгийн салбар зөвлөлийн нийт 50 орчим төлөөлөгчийг хамруулж, гэрчилгээ олгосон юм байна.

Цаашид холбогдох газар нь энэ төрлийн сургалт, дадлагыг бүсчлэн зохион байгуулах гэнэ.