Үндэсний аюулгүй байдлын зөвлөлийн төсвийн ерөнхий менежер, Ажлын албаны дарга Б.Хурцыг Лондонгийн цагдаа нар саатуулжээ. Тэрбээр Англид томилолтоор ажиллаж байсан аж. Түүнийг хилийн чанадад саатуулсан шалтгааныг С.Зориг агсныг хөнөөсөн хэрэгт сэжигтнээр татагдсан Д.Энхбаттай холбох ч хүмүүс байна. Учир нь Б.Хурц Тагнуулын ерөнхий газарт ажиллаж байхдаа Д.Энхбатыг 2003 онд Францаас баривчилж авчрах ажлын гүйцэтгэх багт орсон байжээ. Сэжигтэнг гадаадаас баривчилсан нь хууль зөрчсөн талаар өмгөөлөгч нь олон улсын хүний эрхийн байгууллагад хандаж байсан билээ.  Долоон жилийн өмнө гүйцэтгэсэн дээрх ажлаар нь шалтаглаж Лондонгийн цагдаа нар Б.Хурцыг баривчилсан гэх таамгийг хуулийн байгууллагын эх сурвалж үгүйсгэсэн юм.

Эх сурвалжийн мэдээлснээр Б.Хурц Лондонд багахан хэмжээний зөрчил гаргасан байх магадлалтай аж. Тухайлбал, замын хөдөлгөөний дүрэм зөрчсөн гэх үндэслэлээр шалгуулсан байж мэднэ. Тийм тохиол­долд заавал эх оронд нь болон тус улсад суугаа Элчин сайдын яам, Консулд мэдэгдэх шаардлагагүй аж. Харин талийгаач Д.Энхбатыг баривчилсан гэх хэргээр саатуулах байсан бол олон улсын интерполын шугамаар эрэн сурвалжлах учиртай. Б.Хурцыг интерполоор эрэн сурвалжлаагүй, ямар нэг хэргийн сэжигтэн байгаагүй гэдгийг Цагдаагийн ерөнхий газраас мэдээлсэн юм. Тиймээс Б.Хурцыг Тагнуулын ерөнхий газарт ажиллаж байсан үеийнх нь асуудал дээрх баривчилгаанд огт хамаагүй бололтой. Ха­рин хууль бус наймааны хэрэгт холбогдсон байх магадлалтайг эх сурвалж хэлсэн юм.

Монгол Улсын Үн­дэс­ний аюулгүй байдлын зөвлөлийн ажлын ал­баны дарга харь улсад сэжигтнээр татагдсан талаар холбогдох байгуул­лагуудад ямар ч мэдээлэл ирээгүй аж. Гадаад харил­цааны яамны олон нийт­тэй харилцах газраас да­раах хариултыг өглөө.

-Б.Хурцыг арав гаруй хоногийн өмнө Лондонгийн хууль сахиулагчид барив­чилжээ. Ямар шалтгаанаар саатуулсан юм бол?

-Гадаад харилцааны яам­ны Консулын газарт энэ та­лаар албан ёсны мэдээлэл ирээгүй байна. Тийм учраас баривчилсан, баривчлаагүй гэж таамаглаж болохгүй.

-Лондонд суугаа Элчин сайд, Консул ч мэдээлэлгүй байгаа юу?

-Тухайн улсын хуулиар асууд­лыг шийдэх ёстой. Ямар нэг хэрэгт сэжиглэсэн бол тухайн хүний эрхийг хүндэтгэж мэдээлэл гар­гахгүй байж ч болно. Манай улсыг төлөөлж байгаа Кон­сул Б.Энхбаяраас ямар нэг мэдээлэл ирээгүй байна. Уг нь гадаадад айлчилсан, түр амьдрахаар очсон бол Консулын хэлтэстээ бүрт­гүүлэх учиртай. Гэтэл манай улсын олонхи иргэн бүрт­гүүлдэггүй.

-Үндэсний аюулгүй байдлын зөвлөлийн нөлөө бүхий албан тушаалтан 10 гаруй хоног харь оронд саатуулагдсан байхад Гадаад харилцааны яам мэдээлэлгүй байна гэдэг үнэмшилгүй биш үү?

-Албаны мэдээлэл ирээгүй гэж хэлсэн. Гэхдээ ямар нэг хэрэгт холбогдсон бол тухайн улсын хуулиар шалгаж, сэжигтэй эсэхийг нь тогтоох учиртай. Түүний дараа албан ёсны мэдээлэл өгөх байх. Гэтэл энд янз бүрээр таамаглах боломжгүй.

-Үндэсний аюулгүй байдлын зөвлөлөөс танай яамнаас мэдээлэл хүссэн үү?

-Тэр талаар хэлж мэдэхгүй байна.

Таг­нуулын ерөнхий га­зарт ч Б.Хурцыг Лондонд саатуулсан талаар өчигдрийн байдлаар ямар нэг мэдээлэл байхгүй байлаа. Үндэсний аюулгүй байдлын зөвлөлөөс ч тодорхой мэдээлэл өгөхөөс татгалзсан юм.

Зохиогчийн эрх: "Улс төрийн тойм" сонин