Монгол Улсын Ерөнхий сайд АНУ-ын Нью-Йорк хотноо айлчлал хийх үеэрээ “Тавантолгойн сонгон шалгаруулалтад Лондонгийн хөрөнгийн бирж ялах магадлалтай” гэсэн мэдэгдэл хийсэн. Гүйцэтгэх засаглалын тэргүүний хувьд хариуцлагатай мэдэгдэл байсан нь лавтай. Гэтэл Улаанбаатар хотноо ТӨХ-ноос “Сонгон шалгаруулалт үргэлжилж байна. Хэн ялсныг хэлэхэд эрт байна” гэсэн мэдээлэл хийлээ. Мэдээж энэхүү зөрүүг Төрийн өмчийн хороо дахь хөрөнгийн биржийн итгэмжлэгдсэн төлөөлөгч нь хариуцлагатайгаар няцааж байгаа. “Сонгон шалгаруулалтад есөн баг саналаа ирүүлснээс Үнэлгээний хороо дөрвийг нь шалгаруулж дүгнэлт гаргаад Засгийн газарт танилцуулахаар бэлтгэж байна” гэсэн мэдээллээс өлгөж аваад, сэтгэлийн хөдөлгөөнөөр тийм мэдээлэл хийсэн гэж Ерөнхий сайдыг гөрдөх хэцүү. Гэхдээ учир байна. Нэгэнт тухайн улсын Гүйцэтгэх засаглалын тэргүүн тэгээд хэлчихсэн бол “Уучлаарай, андуурч” гэсэн залруулга хийх боломжгүй. Тиймээс Лондонгийн хөрөнгийн бирж шалгарна, эсвэл Монголын тал тэднийг дэмжихээс өөр аргагүйд хүрч байгаа юм.
Энэхүү будлиан одоогоос таван жилийн өмнө тухайн үеийн Ерөнхийлөгч Н.Энхбаярын ОХУ-д хийсэн айлчлалын үеэр болсон нэгэн хэрэгтэй тун ижил төстэйгээр өрнөж байна. Хөөрхий мөнөөх л Д.Сугартай холбоотой юм. Манай гуравдахь Ерөнхийлөгч Н.Энхбаяр ОХУ-ын Ерөнхийлөгч В.Путины урилгаар айлчилж байгаа гээд бөөн сүр болж үдүүлээд гарсан. Гэтэл “урьсан” гэх В.Путин нь түүнийг хүлээн авч уулзаж болох цорын ганц нөхцөл нь “Монголросцветмет нэгдэл Монполиметтэй гэрээ байгуулсан байх ёстой” гэсэн болзол байв. Ингээд В.Путинтай уулзахын өмнө Элчин сайд Л.Хангайн өрөөнд дагалдагсдадаа агсам тавьж “Монголросцветмет нэгдэл”-ийн захирал О.Эрдэнийг бүлтэгнүүлсэн төдийгүй ТӨХ-ны дарга Д.Сугарыг В.Путины шаардсан гэрээг яаралтай хийж факсаар явуулахыг шаардсан. Д.Сугар хуульчийн хувьд ч, төрийн албан хаагчийн хувиар ч энэхүү арга ядсан хуйвалдаанаас бултахыг хичээсэн боловч яаж ч чадаагүй. Гэвч Засгийн газрын шийдвэрээр ажиллах ёстой тул Ерөнхий сайд М.Энхболдтой зөвлөхөөс аргагүй гэж хэлсэн. Харамсалтай нь М.Энхболд намын бүлгийн хуралтай байсан учраас Н.Энхбаярыг залгахад утсаа аваагүй. Ингээд Д.Сугар хожмын өдөр хэрэгтэн болж үлдэхгүйн тулд хуульчийн ёсоор заль хэрэглэн “Таны илгээсэн захидлын дагуу Монголросцветмет нэгдлийн Удирдах зөвлөлийг хуралдуулсан” гэсэн бөөрөнхий хариу өгсөн байдаг. Гэвч энэ хариуны ачаар Н.Энхбаяр В.Путинтай нүүр учирч, айлчлал арайхийн амжилттай болсон. Мэдээж үүний дараа болсон явдлын талаар дуулиан үүссэн. Дуулианы нууцыг задалсан хүмүүсийн нэг нь Д.Сугар өөрөө ч байж болох юм. “Гаалийн” Х.Баатарыг танихгүй гэж мэлзсэнээс харахад уснаас хуурай гарахын тулд юу ч хийж мэдэхээр хударгагүй нөхөр шүү дээ. Гэхдээ хэдийгээр шахаанд орж буруутай үйлдэлд оролцсон ч нөхцөл байдлын үнэн бодит байдлыг задалсан нь төрийн албан хаагчийн эр зориг биш гэж үү.
Энэ удаа ч гэсэн Д.Сугар яг ийм шахаанд ороод байж болзошгүй дүр зураг харагдаж байна. Тэрбээр хуульчийн хувиар Ерөнхий сайд ташаа мэдэгдэл гаргасныг анзаармагцаа дагаад намирвал буруутахаа мэдээд, ТӨХ-ны даргын хувьд “Лондонгийн бирж сонгон шалгаруулалтад ялаагүй шүү. Сонгон шалгаруулалт дуусаагүй байна” гэсэн үнэн зөв мэдэгдэл гаргалаа. Үүнийхээ төлөө суудлаа өгөх нь зайлшгүй. Үнэхээр ч Д.Сугарын өөрийнх нь хэлснээр ийм нөхцөлд ТӨХ-ны даргын суудлаа авбал авна л биз. Өнөөдрийн улс төр иймдээ хүртэл ялзарчихсан юм чинь.
Зохиогчийн эрх: "Улс төрийн тойм" сонин