Гэхдээ тэдний дунд МАХН-ын дарга С.Батболд, Ерөнхий нарийн бичгийн дарга У.Хүрэлсүх хийгээд УИХ-ын гишүүд, сайд, дарга нартай эн тэнцэх албан тушаалтан харагдсангүй. Гагцхүү ард олны төлөөлөл л ард олноос нэгэн цагт сонгогдож, нэгэн цагт ард олны саналаар ялагдаж байсан экс Ерөнхийлөгчийг дэмжихээр иржээ. Бас болоогүй зарим нэг нь нам бус гэх бөгөөд Н.Энхбаярыг дэмжих нь чин зүрхний итгэл үнэмшил болсон гэнэ. Үүнд нь баярлаж догдолсон, дараагийнхаа улс төрийн алхамд ашиглаж болох халуун бүлтэй болсондоо талархсан Ерөнхийлөгч асан Н.Энхбаяр гэхдээ тэдэнд бүтэн өдрийн цаг гаргаж амжаагүй нь сонин. Учир нь тэрбээр “МАХН-ын шинэчлэл: Ухрах уу, урагшлах уу” хэмээх уг хэлэлцүүлгийн нээлтэд оролцож, албан ёсны гол дүр нь болохоо баталсан даруйдаа гараад явсан. Гэвч хөгжөөн дэмжигчид нь түүнийг бүтэн өдрийн турш гол тоглогч болгож, Н.Энхбаяргүй МАХН, Н.Энхбаяргүй Монгол Улс урагшлах бус ухарч буй гэдэг дүгнэлтийг хийсэн юм.
Ингэхдээ МАХН-ын нэрийг солих нь Монгол Улсын нэрийг сольж байгаатай агаар нэг гэх нь холгүй мэдэгдлийг Н.Энхбаяр эгэл гишүүний үгээр хэлүүлж чадсан нь бахархууштай. Бас болоогүй “Одоогийн МАХН болон Засгийн газрын удирдлага Монголыг “Айвенхоу майнз”-ын ломбарданд тавьж байна. Тэднээс зээлсэн мөнгөө тараахын тулд гарын хээ авахуулж байгаа нь эргээд бүх монголчуудыг барьцаанд тавьж, зээл төлөхгүй бол сүйрэх гарцаагүй сонголтод оруулж байгаа хэрэг. Ийм байж болохгүй” гэсэн хамгийн хатуу шүүмжлэлийг ч хөгжөөн дэмжигчээрээ тэрбээр хэлүүлж чадсан. Энэ бол Н.Энхбаярын өөрийнхөө төлөө өрөөл бусдыг хөдөлгөж чаддаг агуу их хүчийн илэрхийлэл.
Тэр ч бүү хэл бусдыг өөртөө урвуулж чаддаг хүчээрээ эдийн засагч Н.Дашзэвэгээр “Бид ардчилсан социалист нийгмээ байгуулах нь чухал. Одоо түүнээсээ урваж болохгүй. Би анх 1992 онд МАХН-д элссэн гишүүн нь” гэдэг үгийг хэлүүлж чадсан бол Эрүүл мэндийн дэд сайд асан Н.Удвалын намынхаа удирдлагад гомдсон сэтгэлийг дэврээж “МАХН-ын удирдлага бол хариуцлагагүй. Улс төрийн нам ийм хариуцлагагүй байж болохгүй” гэдэг утга агуулга бүхий бүхэл бүтэн 15 минутын илтгэл тавиулсан юм. Нэгэн цагт эрх мэдлийн амтыг мэдэрч, эгээтэй л Эрүүл мэндийн толгой сайд болоогүй түүний хувьд 2008 оноос хойш МАХН-ын удирдлагад гомдсон сэтгэлээ нууж байсан удаагүй. Цаг үргэлж шударга, зарчимч улстөрч эмэгтэйн зангарга гаргахыг оролддог ч тэр нь Н.Энхбаяр Ерөнхийлөгч болж чадаагүйнхээ төлөө сөрөг улс төрийг зурж буйтай агаар нэг. Учир нь аль аль нь албан тушаал хүртээгүйнхээ төлөө нийгмийн сэтгэл зүйг дайсны “сум”-аар цэнэглэж байгаа гэхэд болно.
Түүнчлэн уг хэлэлцүүлгийн Н.Энхбаярын төлөө дуугаа өндөрсгөсөн эгэл гишүүдийнх нь шилдэг афоризмуудаас түүвэрлэн хүргэхэд “Энэ цаг үед үндэстэн ярих хэрэггүй. Одоо дэлхийгээс ямар мөн чанараараа ялгарах юм бэ. Германы Гитлер шиг л болох гээгүй юм бол үндэсний ардчилсан үзэл хэрэггүй”, “МАХН хариуцлагагүйн үүр уурхай болсон. Их хурлаас сонгогдсон дарга нар эрх мэдлээ хэтрүүлэхдээ гаршсан байна. Энэ дунд Н.Энхбаяр шиг хүн л хэрэгтэй”, “70 жил төр барьсан МАХН одоо төр барьж чадахаа больсон юм уу. Чадахаа больсон учраас хамтарч ажиллаж байна гэж ойлгож болох уу” гэх мэт дүгнэлтүүд байгаа.
Арваад хоногийн өмнө МАХН-ын удирдлага хийгээд эрх мэдэлтэй дарга нар төрийн ордонд чуулж, намынхаа үзэл баримтлал болон нэрийг солих нь зөв гэдэг дээр санал нэгдсэн. Иймээс ч энэ саналыг намынхаа Их хурлаар хэлэлцүүлэхээр болж, улмаар Ардчилсан социалист залуучуудын холбооны гишүүд нь Нийгмийн ардчилал Монголын залуучуудын холбоо нэрийн дор зангидагдах болсон. Эндээс МАХН ч тэр Монгол Ардын нам гэдэг нэрийг авах нь тодорхой гэж ойлгож болно. Харин энэ удаагийн энхбаяризм-ыг шүтэгчид буюу өөрийнх нь хэлээд буй дээрх эгэл олны хувьд намынхаа Их хуралд зориулж “Нэрээ, үзэл баримтлалаа сольж болохгүй” гэсэн зөвлөмж хүргүүлэхээр болсон.
Энэ бол Н.Энхбаярын арай хийн олж авсан нэг боломж. Гэвч түүнийг нь МАХН-ын удирдлагууд өс санасан үүрдийн өстний өөдгүй санаа гэдгээр хүлээж авах нь тодорхой. Гарцаагүй байж болох түүний өсрөхсөн сэтгэл харин хаа хүртэл бадамлах бол. Түүнийх нь балгаар эгэл олны хий хөөрөгдсөн сэтгэл нэг л өдөр хөрж “Н.Энхбаяр биднийг ашиглаад хаячихсан” хэмээн гомдлын нулимс унагавал хичнээн харамсалтай. Н.Энхбаяр нь “МАХН намайг ашиглаад хаячихлаа. МАХН надаас урвачихлаа” гэдэг шиг…Тэр үед хэн нь “Н.Энхбаяртаа баярлалаа” гэж хэлэх сэтгэлтэй үлдэх бол. Тааварлахад ч хэцүү л харилцаа. Н.Энхбаяр хийгээд тэдний хөгжөөн дэмжигчдийн холбоо гэж!
С.ОТГОНЖАРГАЛ
Зохиогчийн эрх: "Улс төрийн тойм" сонин