Нийслэлийн
Засаг дар­гын захирамжаар энэ са­рын 20-ноос нэг сарын хугацаанд
“Хүүхэд бүрт нэг аяга сүү” аян эхлүүлж буй. Үүгээр дунд сургуулийн  бага
ангийнхан болон цэцэрлэгийн хүүхдүүдэд өдөр бүр нэг аяга сүү олгох юм
гэнэ. Ингээд эрүүл ахуй, чанар аюулгүй байдал нь үзлэг шинжилгээгээр
баталгаажсан сүүгээр хан­га­хыг дүүргийн удирд­лагуудад үүрэг болгожээ.
Сүүг “Мон Сүү” ХХК, “Сүү” ХК, “ГУМ” ХХК–иуд нийлүүлнэ. Харин мөнгийг нь
бага ангийн хүүхдүүдэд өгдөг “Үдийн цай хөтөлбөр”-т ногдсон  400
төгрөгөөс, цэцэрлэгийн хувьд нэг хүүхдэд өдөрт ногдох 1100 төгрөгөөс
гаргах юм байна.

Аян зарласан эхний өд­рөөс Сүхбаатар дүүргийн 160, 42, 75, 51, 149
дүгээр цэцэрлэгийн 1265 хүүхдэд сүү өгч эхэлжээ. Сүүний чанар, аюулгүй
байдалд “Багачууд хүнс” нийслэлийн өмчит үйлд­вэрийн газраас хяналт
тавьж байгаа  аж. Бусад дүүргүүд бэлтгэл ажлаа хангаж дуусаад ирэх долоо
хоногоос сүүгээ өгнө.
Сүүний чанар аюулгүй байдалд холбогдох  байгуул­лагууд хяналт тавьж
байгаа гэх ч өдөр бүр хэдэн зуун литрээрээ нийлүүлж буй сүүний хангамж,
шинэлэг байдалд эргэлзэх хүн олон бий. Өмнө нь “Үдийн цай”-ны чанар
аюулгүй байд­лыг хангаагүйгээс  хүүх­­дүүд хордлого авсан то­хиолдол
бийг санах учир­тай. Энэ талаар нийс­лэлийн Мэргэжлийн хя­нал­тын газрын
байцаагч н.Нарангэрэлээс тод­руу­лахад “Сүү нийлүүлэх гур­ван компанийн
үйл ажил­лагааг хичээлийн шинэ жил эхлэхэд шалгасан. Зөрчил дутагдал
илрээгүй. Сургууль, цэцэрлэгүүдэд ажил жигдэрсний дараа  хяналт шалгалт
тогтмол тавихаар төлөвлөсөн” гэв.

Энэхүү аянд тулгарч буй нэг бэрхшээл нь үйлдвэрлэгч компаниудын хүчин
чадал, тухайн өдрийн сүүний нийлүүлэлтээс ха­маараад 1-5 дугаар ангийн
97 мянга 256 сурагч,  цэцэр­лэгийн 48 мянга га­руй хүүхдэд өдөр бүр сүү
тарааж хүрэлцэхгүй байх магадлалтай  гэдгийг тус аяныг зохион
байгуулагчид хэлж байна.  “Гум” ХХК-ийн хувьд өдөрт найман тонн сүү
боловсруулах хүчин чадалтай, сүүгээ өдөр бүр Зүүнхараагаас авдаг гэх.
Тус компани нийслэлийн 38 цэцэрлэгт нэг литр сүүг 1200 төгрөгөөр, 32
сургуульд нэг хүүхдэд өгөх сүүгээ 200 төгрөгөөр тооцон нийлүүлдэг аж.
Тэд хэлэхдээ, “Сарын хугацаанд гэрээний дагуу өдөр бүр сүүгээ нийлүүлж
чадна” гэв. “Мон сүү” ХХК ч мөн адил Зүүнхараагаас татдаг. Тус компани
50 гаруй цэцэрлэгт нэг тонн орчим сүү нийлүүлнэ. Харин “Сүү” хувьцаат
компани  хэд хичнээн тонн сүү хэдэн сургууль, цэцэрлэгт нийлүүлэх нь
тодорхойгүй байна. Тус компаниас ерөн­хий боловсролын сур­гуулиудтай
хийсэн “Үдийн цай” хөтөлбөрийн гэрээ­ний дагуу сүү нийлүүлдэг аж.

Эх сурвалжийн мэ­дээлс­­нээр нийслэлийн төс­вөөс тодорхой хэм­жээ­ний
санхүүжилт гар­гахаар төлөвлөсөн гэж бай­гаа ч одоогоор хэд хич­нээн
төгрөг гаргах нь тодорхойгүй байгаа. Гэтэл боловсролын бай­гуул­лагууд
аяны үеэр хүүхдүүдэд тараах сүү­ний мөнгийг үдийн цай, цэцэрлэгийн
өдрийн хоол­ны мөнгөнөөс гаргана гэж батлан хэлж байна. Түүнчлэн аяныг
зохион байгуулагчид ирэх долоо хоногоос сургуулиудад сүү түгээх ажил
жигдэрнэ гэсэн ч өдөр бүр 30 тонн орчим үнээний үнээний цэвэр сүүг өглөө
бүр ариутгаж, сургуулиудад хуванцар аяганд савлаад, цэцэрлэгүүдэд
литрээр нь та­раана гэж байгаа.  Хамгийн гол асуудал нь хүүхдүүдэд
нийлүүлэх сүү цэвэр үнээний сүү байж чадах уу гэдэг нь эргэлзээтэй. Учир
нь үндэсний үйлдвэрлэгч зарим компаниуд хуурай сүүгээр найруулсан
чанар­тай сүү гэж ил цагаан рекламдаж, тарагны хөрөн­гөө урд хөршөөс
авдаг гэд­гийг мэдэхгүй хүн үгүй биз.