Сагсан бөмбөгийн “TLG-13” төрийн бус байгууллага, “MCS Coca Cola” компанитай хамтран зохион байгуулсан сонирхогчдын сагсан бөмбөгийн “Спрайт” лигийн  бүх оддын тоглолтыг өчигдөр Спортын төв ордонд зохион байгууллаа. Энэ удаагийн тоглолтод баруун, зүүн бүсэд хуваагдсан хоёр баг өрсөлдсөн бөгөөд Б.Дамба дасгалжуулагчтай зүүн бүсийн сагсчид тэргүүлэв.  Бүх оддын тоглолтод статистик үзүүлэлтээр шалгарсан тамирчид оролцож, өөрсдийн шилдэг үзүүлбэрүүдээр үзэгчдийг бишрүүлснийг онцлох хэрэгтэй байх.
“Хасу мегаватт” компанийн нэрэмжит гурван онооны шидэлтийн тэмцээнд оролцогчид таван цэгээс нийт 25 шидэлтийг нэг минутад багтаан гүйцэтгэх ёстой байсан бөгөөд энэ тэмцээнд найман шилдэг тоглогч оролцсоноос “Бридж Стар” багийн тоглогч  Б.Төмөрөө 19 оноогоор ялагч болсон. Харин “Скайтел” компанийн нэрэмжит ур чадварын тэмцээнд тодорхой даалгавруудыг хэн хамгийн түрүүнд гүйцэтгэсэн нь тэмцээний ялагч болох байлаа. Энэ тэмцээнд “Их харанга” багийн тоглогч Х.Лхагвадорж даалгаврыг 42 секундэд гүйцэтгэсэн бол  “Хасу Мегаватт” багийн тоглогч Тулга  41 оноогоор хоёрдугаар байрт шалгарч, ивээн тэтгэгч байгууллагын шагнал хүртлээ.

Харин “Тwo ball” шидэлтийн тэмцээнд Худалдаа хөгжлийн банкны тоглогч Оюун-Эрдэнэ, Алтантуяа нар 66 оноогоор бусад өрсөлдөгчөөсөө илт ялгарч байсан гэхэд болно. Ингээд сагсан бөмбөг сонирхогчдын  хамгийн их хүсэн хүлээж байсан “Slam dunk” буюу цагариган дээрээс довтлох тэмцээн эхлэх мөчид Спортын төв ордны тог тасарч, үзэгчдийг бухимдуулаад авсан хэдий ч хэсэг хугацааны дараа тэмцээн үргэлжилсэн юм. Цагиран дээрээс довтлох тэмцээнд зургаан шилдэг тоглогч оролцсоноос “Отгонтэнгэр” их сургуулийн тамирчин Н.Нямдорж тэргүүн байрт шалгарч, Бээжинд болох NBA-гийн аялан тоглолтыг үзэх эрхийн бичгээр шагнуулсан юм. Тэмцээний зохион байгуулалт сайн байсан гэдгийг үзэгчид онцолж байлаа.
Ц.Хишиг