Нийслэлийн Хан-Уул дүүргийн 13 дугаар хороо, дөрөвдүгээр хэсэг, Туул тосгонд тогтоогоод байсан хорио цээрийн дэглэмийг цуцалжээ. Өнгөрсөн сарын дундуур тус тосгонд байрлах “Нионшель” ХХК-ийн тахианы аж ахуйд шувууны халдварт “Ньюкасль” өвчин илэрсэнтэй холбогдуулан хорио цээрийн дэглэм тогтоогоод байсан юм. Холбогдох мэргэжлийн байгууллагууд дэглэмийн бүсэд ариутгал халдваргүйтгэлийн ажлыг хийж, ойр орчмын шувууны аж ахуйгаас шинжилгээ авсан. Шинжилгээний дүнгээр аж ахуйн нэгжүүдээс шувууны халдварт “Ньюкасль” өвчин дахин илрээгүй тул өчигдөр тус дүүргийн Засаг даргын 318 тоот захирамжийн дагуу хорио цээрийн дэглэмийг цуцлаж, хээрийн штабыг 17:30 цагт буулгажээ.
П.Наран