Монгол Улсаас ОХУ-д суугаа Элчин сайдын яам Үндэсний статистикийн хороотой хамтран Хүн ам, орон сууцны улсын тооллогын талаар өчигдөр семинар зохион байгуулав. Семинарын үйл ажиллагаанд Монгол Улсаас ОХУ-д суугаа Онц бөгөөд Бүрэн эрхт элчин сайд Д.Идэвхтэн, Үндэсний статистикийн хорооны дэд дарга Б.Эрдэнэсүрэн, Москва хотод ажиллаж амьдарч буй дипломат ажилтан, монголын аж ахуйн нэгж, байгууллагын төлөөлөгчийн газар, олон улсын байгууллагад ажиллагсад болон хувийн хэргээр байнга оршиж буй монгол иргэд, улсын тэтгэлэг, хувийн зардлаар суралцаж буй оюутан залуусын төлөөлөл оролцлоо.Гадаадад оршин суугаа иргэдэд тооллогод хамрагдахын ач тусыг, ялангуяа хууль бусаар оршин суугаа иргэдэд тооллогод хамрагдснаар эрх ашиг нь ямар нэгэн байдлаар огт хөндөгдөхгүй, харин ч төрийн хишиг, үйлчилгээ хүртэх боломжийг нь нээнэ гэдгийг сайтар ойлгуулахын семинарт оролцогчдод Үндэсний статистикийн хорооны дэд дарга Б.Эрдэнэсүрэн мэдээллийнхээ үэр онцлон тэмдэглээд та бүхэнтэй уулзаж санал бодлоо илэн далангүй солилцсон нь гадаадад оршин суугаа иргэдийг тооллогод хамруулахад учирч болох хүндрэлийг танин мэдэх ач холбогдолтой боллоо. Семинарын үеэр хөндөгдсөн асуудлуудыг дахин нягталж Гадаад харилцааны яам, Үндэсний статистикийн хорооноос танай Элчин сайдын яамтай хамтарч Москва хотноо зохион байгуулах сургалтын үеэр та бүхэнд өгөх удирдамжиндаа тусгах болно хэмээн хэлэв.
Уулзалтын төгсгөлд Элчин сайд Д.Идэвхтэн ОХУ-ын төрийн статистикийн холбооны албаны урилгаар тус улсад хийж буй айлчлалынхаа үеэр зориуд цаг гарган энэхүү семинарыг хамтран зохион байгуулж оролцсон Үндэсний статистикийн хорооны дэд дарга Б.Эрдэнэсүрэнд талархал илэрхийлсэн талаар Гадаад харилцааны яамны хэвлэлийн албанаас мэдээллээ.
