Хэдэн жилийн өмнө “Бөмбөгөр”  худалдааны төвд гал гарч, маш их хэмжээний хөрөнгө үнс нурам болж байсан билээ.  Өдгөө нийслэлд үйл ажиллагаа явуулж буй худалдааны төвүүдэд энэ байдал давтагдахгүй гэх баталгаа байхгүй талаар Онцгой байдлын байгууллагынхан хэлж байна. Саяхан нийслэлийн томоохон зах худалдааны төвүүдэд шалгалт хийхэд цөөнгүй зөрчил илэрчээ.  Галын аюулгүй байдлаа  хангаагүй, өмнө нь тавьсан шаардлага биелүүлээгүй Улсын их дэлгүүр, “Сарны титэм” зэрэг худалдааны газрын үйл ажиллагааг зогсоохоор болжээ. Нийслэлийн хамгийн томоохон худалдааны төв болох УИД-ийн цахилгааныг таслах талаар Онцгой байдлын газраас харьяа байгууллагад хандаад байгаа аж. УИД-ийн супермаркетын талбайд цахилгааны гэмтлээс болж өнгөрсөн оны арваннэгдүгээр сард хоёр ч удаа гал гарсан байна. Үүний дагуу шалгалт хийж, зөрчлийг нь тогтоон засахыг шаардсан ч өнөөдрийг хүртэл биелүүлээгүй байна. Гол зөрчил нь өргөтгөл хийж агуулахаа үйлчилгээний танхим болгосон гэж үзэж байгаа юм байна.  Гал гарсан тохиолдолд унтраах боломжгүй байгаа байдлыг анхааруулах, аюулгүй байдлыг хангах үүднээс шаардаж байгаа нь энэ аж.