“Формула нэг”-ийн дэлхийн аваргын төлөөх өрсөлдөөнийг ерөнхий дүнгээр тэргүүлж буй Марк Уэббер амралтын өдрүүдэд болох Сингапурын гран-при уралдаанд түрүүлж, давамгайллаа бататгана гэдэгтээ итгэлтэй байна. “Red Bull” багийн нисгэгч тэрбээр өмнөх гараа болох Италийн гран-прид зургадугаар байрт шалгарснаар ерөнхий дүнгээр хошуучлах болсон бөгөөд Сингапурын уралдааны тойрог зам нь Унгар болон Монте Карлогийнхтай төстэй учир түрүүлж чадна гэдэгтээ итгэл төгс байгаагаа илэрхийлсэн юм. Сануулахад, тэрбээр Унгар болон Монте Карлогийн гараанд тэргүүлсэн билээ.
Уэббер “Би Сингапурт дуртай. Шөнөөр уралддаг болохоор үнэхээр онцгой байдаг. Монако болон Будапештэд байдаг тойрог замтай төстэй болохоор би хувьдаа өндөр үр дүн төсөөлж байна” гэжээ.
Хэдийгээр Уэббер өнгөрсөн жилийн Сингапурын уралдаанд барианд орж чадаагүй боловч энэ удаад байдал өөр байна гэдэгт итгэж байгаа аж. Харин энэ удаад түүний гол өрсөлдөгч нь мэдээж “McLaren”-ы Льюис Хэмильтон байх болно. Өнгөрсөн жил Сингапурын талбарт түрүүлсэн Хэмильтон “Өнгөрсөн жил Сингапурт түрүүлсэн нь миний карьерын хамгийн их догдлуулсан мөчүүдийн нэг байлаа. Хамгийн түрүүнд барианы шугамыг давна гэдэг гайхалтай мэдрэмж. Энэ удаад ч гэсэн үүний төлөө уралдах болно” хэмээжээ.

С.Цэлмэг