Хэл аманд байнга орж байдаг дээдсийн хүрээний танхил бүсгүй  Парис Хилтон хоёр удаагийн хөнгөн  гэмт хэргийн улмаас нэг жилийн тэнсэн харгалзах ял сонсчээ.  Түүнийг сарын өмнө хар тамхи биедээ авч явсан болон цагдаагийн оффицерын ажилд саад болсон хэргээр ял оноож, баривчилсан юм. Гэвч түүний гуйлтаар  шоронд хорихын оронд 12 сар тэнсэн харгалзах ял болгосон байна.  Хэрэв дээрх хугацаанд Парис дахин гэмт хэрэгт орооцолдвол шоронгын хаалга татах юм.

Түүний тэнсэн харгалзах хугацаандаа байх  засан хүмүүжүүлэх төвийн нэгэн ажилтан  Хилтон зочид буудлын өв  залгамжлагчид “Энэ бол  Waldorf-Astoria биш шүү. Зан аашаа засах нь таны зорилго” гэж  хэлсэн аж.  Түүнээс гадна Парис  хоёр мянган ам.долларын торгууль төлж, 200  цагийн нийгмийн ажил хийх ёстой болж байгаа юм. Өнгөрсөн сарын 27–нд Лас Вегаст  Парис Хилтоны  машиныг цагдаа нар саатуулж, нэгжлэг хийхэд  0.8 гр кокайн түрийвчнээс нь гарсан аж.

Тэрбээр мөн оны эхээр согтуугаар машин жолоодсон хэргээр гурван долоо хоног шоронд хоригдож, Өмнөд Африкт хар тамхи зөөвөрлөсөн хэргээр сэжиглэгдэн баривчлагдаж байсан юм. Гэвч удалгүй суллагдсан билээ.

Б.Энх