Нью-Йорк хотод НҮБ-ын төв байранд  дэлхийн удирдагчид даваа гаригт хуран цуглаж, Мянганы зорилтын эрхэм зүйл болох ядуурлыг бууруулах, сая сая хүнийг үхлээс аврах дэлхий нийтийн үйлсэд шинэ түлхэц өгөхөөр ярилцаж эхэллээ.

Дэлхийн удирдагчид гурав хоногийн туршид мянганы хөгжлийн зорилтыг хэрэгжүүлэхэд өнөө үед хоцорч яваа болон хангалттай бус явцтай байгаа стратеги чухал асуудлыг тунгаан хэлэлцэж, урагшлуулах талаар санал бодлоо солилцох юм байна. Тэд нэн ядуу амьдралтай хүмүүсийн тоог тавин хувиар бууруулах, тав хүртэлх насны хүүхдийн нас баралтыг 3/2 хувиарь бууруулах зэрэг  төлөвлөсөн хугацаанаас хоцорч яваа 8 гол асуудлыг нарийвчлан хэлэлцэх аж.

Мянганы гол зорилтуудыг бүрэн хэрэгжүүлж дуусгахад тавхан жилийн хугацаа үлдэж байгаа боловч дэлхийг нөмөрсөн эдийн засгийн хямралаас шалтгаалан санхүүжүүлэх асуудал бэрхшээлтэй тулгарч байгаа ажээ. Мянганы зорилтыг хэрэгжүүлэхэд зориулан  Европын Холбоо нэг тэрбум доллар, Дэлхийн банк 750 сая долларыг боловсролын зорилтуудыг хэрэгжүүлэхэд зориулан олгохоор амалсан байна. Энэ нь ойрын таван жилд дахиад 150 сая доллар хуримтлуулах шаардлагатай болж байгаа хэрэг юм.  АНУ-ын ерөнхийлөгч Барак Обама болон ер нь дэлхийн бусад орнууд учирч буй эдийн засгийн хямралаас шалтгаалан жинтэй, мэдрэгдэхүйц хандив хөрөнгийн санхүүжүүлэлт амлах төлөв харагдахгүй байгаа ажээ.

Мянганы зорилтыг хэрэгжүүлэх асуудлыг хэлэлцэх дээд хэмжээний уулзалтад дэлхийн 192 орны төр, засгийн тэргүүн, Гадаад харилцааны сайд нар оролцох юм байна.

Бэлтгэсэн Д.Пунцаг