ОХУ Хятадтай 475 сая тонн коксжих нүүрсний гэрээ үзэглэж, ойрын 25 жилийн хугацаанд нийлүүлэхээр хэлэлцжээ. Энэхүү хэлэлцээрийн дагуу Хятадын тал зургаан тэрбум ам.долларын хөрөнгө оруулалтыг хийх аж. Благовещенскт болсон уулзалтад ОХУ-ын Эрчим хүчний сайд Сергей Шматко, Хятадын Үндэсний эрчим хүчний хуваарилалтын албаны дарга Зян Губао нар оролцож, гарын үсэг зурсан юм.
Энэ үеэр Сергей Шматко “Гэрээний дагуу Оросын тал эхний таван жилд 15 сая тонныг, үлдсэн нүүрсийг  жил бүр 20 сая тонноор нийлүүлэх болно” гэсэн байна. Хятадын зүгээс хөрөнгө оруулж буй зургаан тэрбум ам.долларыг оросууд уул уурхайн салбар, дэд бүтцийнхээ хөгжилд  зарцуулах аж. Өнгөрсөн жил Оросын тал 12.09 сая тонн нүүрс Хятад руу нийлүүлсэн бөгөөд энэ оны эхний хагасд нийт зургаан саяыг мөн экспоролсон юм. Ер нь ОХУ Хятадын дөрөвдэгч том нүүрс экспортлогч агаад удахгүй эхний байрт шилжих магадлалтай юм байна.

Г.Амартүвшин