Гэртээ хүүхэдтэйгээ хамт байх боломж эцэг эхчүүдэд тэр бүр байдаггүй. Тэгвэл хүүхэдтэйгээ хэрхэн харьцах ёстой юм бол. Сэтгэл зүйчид зав багатай эцэг эхчүүдэд зориулан 10 зөвлөмж өгч байна.

1.Өлсгөлөн битгий харь.
Өлссөнөөс болж ямар ч хүн ууртай, тэвчээргүй болдог. Гэртээ харихаас өмнө зав, боломж муу байлаа ч ядаж нэг аяга кофе, эсвэл тараг уучих хэрэгтэй.
2. Ядрах хэрэггүй
Биеийн болон оюуны хэт ачааллын үед ямар ч хүн өөрийгөө тун таагүй болсныг мэдэрдэг. Ийм үедээ бухимдуу, уур уцаартай болдог. Гэхдээ таны ажил бүтэлгүй, ажилд дарагдсанд хүүхэд ямар ч буруугүй биз дээ. Хүүхэд эцэг эхээ юунаас болж уцаарлаад байгааг мэдэхгүй. Тиймээс томчуудын асуудлыг хаалганы цаана үлдээгээд гэртээ орж бай.

3. Ажил бол ажил
”Ажил нь надаас чухал юм байна” гэсэн ойлголтыг хүүхэддээ төрүүлэхгүйн тулд гэртээ ажлынхаа асуудлыг хэзээ ч битгий ярьж бай. Ажил чинь танд таалагддаг, харин хүүхэддээ та хайртай.

4. Хүүхэд нэгд
Амжаагүй ажлаа гэртээ хийхээр яг ширээний ард суучихсан үед эсвэл оройн хоолоо ид бэлдэж байхад хүүхэд чинь тань дээр ирвэл та түүнийг “түлхэж” болохгүй. Хүүхэд бол хүн шүү дээ. Ажил, үдийн хоол хүлээж л байг.

5. Таагүй ажлыг  өөрөө хий
Хүүхэд бол танай гэр бүлийн тэгш эрхт нэг гишүүн. Туслагч ч байж магад. Гэр доторх хамгийн таагүй ажлыг хүүхдэд оноож, ялгаварлах хэрэггүй. Тухайлбал, бохир сув суулга, шал угаалгах. Яагаад заавал хүүхэд хог хаях ёстой гэж?
6. Хүүхдээ итгэлтэй болго
Хүүхдээсээ илүү гэдгээ нотлох хэрэггүй. Та насанд хүрсэн хүн. Зөвхөн энэ шалтгаанаар та илүү мэдэж, илүү хийдэг. Сав суулгаа гялалзтал угааж, компьютер тоглоом мундаг тоглодог л байх. Та хүүхдийг  өөртөө итгэлтэй, хүчирхэг, үе тэнгийнхээсээ ялгарч байхыг нь хүсч байна уу. Тэгвэл хүүхдээ ухаалаг, авхаалжтай гэдгийг нь  мэдрүүлж бай.

7. Ажил чухал бол…
Хэрвээ ажил чинь таны амьдралын утга учир болсон бол хүүхэдтэй болох шаардлагагүй. Ийм гэр бүлд хүүхэд аз жаргалгүй байж, хурдан насанд хүрэхийг л хүсдэг. Энэ бол эрүүл бус гэр бүлийн шинж.

8. Хүүхдээ сонсч сур
Ихэнх эцэг эхчүүд хүүхдийнхээ хэлсэн үгийг ач холбогдолгүй, чухал биш хэмээн үздэг юм. Хүүхэд хэдий бага ч түүний үгэнд “глобаль” ойлголтууд нуугдаж байдаг. Үнэн хэрэгтээ хүүхдийн бүх л үг яриа, үйлдэл, ажил таныхтай яг адил чухал зүйл.
Хүүхдийнхээ сонирхолд доог тохуутай, шүүмжлэлтэй хандвал та хоёрын хооронд ямар ч итгэлцэл үүсэхгүй. Хүүхдийнхээ алхам бүрийг хянах бус харин ойлгох хэрэгтэй.
9. Хүүхэдтэй  зөвлө
Ажил дээрээ юу хийдэг чинь хүүхдэд бас сонин байдаг. Түүнд өөрийн санаа бодол, эмзэглэж буй зүйлийнхээ тухай ярь. Энэ бүхнийг сайжруулах талаар түүнээс зөвлөгөө ав.
Хүүхэд томчуудын ажлыг ойлгох хэмжээнд өсч том болоогүй байна гэж битгий бод. Тэр олон зүйлийг ойлгохгүй байж болно. Гэхдээ  сэтгэл хөдлөлийг сайн мэдэрнэ. Тиймээс түүний зөвлөгөө зарим үед таныг бүр гайхашруулж ч магад. Хүүхэдтэйгээ зөвлөлдөх нь гэр бүлд нээлттэй, илэн далангүй уур амьсгалыг үүсгэн, итгэлцлийг бий болгодог.

10. Битгий зэмлэ
Хүүхэд танаас эд, мөнгөний хамааралтай байгааг сануулахаас аль болох зайлсхийж бай. Энэ нь хүүхдийг эмзэглүүлж, дорой  байдалд оруулдаг. Магадгүй сэтгэлийн гүндээ шударга бус зүйлийн талаар  таагүй сэтгэгдэлтэй үлдэж ч мэднэ. Хүүхдийг  аав ээжээс нь  хөндийрүүлж болзошгүй.

Medeelel.com