НХХЯ-нд өнгөрсөн дөрөвдүгээр сард МҮЭХ, АОЭХ-ноос төрийн албан хаагчдын цалин, тэтгэвэр, тэтгэмжийг нэмэгдүүлэх шаардлага тавьсан. Энэхүү шаардлагын хариуд гурван талт хэлэлцээр хийж, аравдугаар сарын 1-нээс цалин, тэтгэвэр, тэтгэмжийг 30 хувиар нэмэхээр болсон билээ. Тиймээс цалин, тэтгэвэр, тэтгэмжийг 30 хувиар өсгөхийн тулд 78.2 тэрбум төгрөгийг төсвийн тодотголд суулгасан. Үүнд төрийн албан хаагчдын цалингийн нэмэгдэлд 49.3 тэрбум төгрөг, тэтгэвэр, тэтгэмжийг нэмэгдүүлэхэд 28.9 тэрбум төгрөг төсөвлөсөн байна. Харин Засгийн газрын 15-нд болсон хуралдаанаар төрийн албан хаагчдын цалинг ирэх сарын 1-нээс эхлэн төсөвт тусгасаны дагуу 30 хувиар нэмэх шийдвэр гаргаж хэлсэндээ хүрлээ. Харин МҮЭХ цалинг ялгавартай нэмэх саналыг Засгийн газарт дахин хүргүүлэв. Учир нь Төрийн жинхэнэ албан хаагч, Төрийн үйлчилгээний албан хаагчдын цалин их зөрүүтэйгээс болж цалин харьцангуй нэмэгдэнэ. Тиймээс цалинд ялгавартай хандаж, их цалинтай төрийн албан хаагчдын цалинг бага нэмэгдүүлэхгүй бол нийгмийн шударга бус хуваарилалт явагдана гэж тэд үзэж байгаа юм. Гэтэл Нийгмийн хамгаалал, хөдөлмөрийн сайд Т.Ганди дээрх шаардлагад “Дунджаар төрийн албан хаагчдын цалин 24.3 хувь нэмэгдэхэд том зөрүү гарахгүй. МҮЭХ-ноос тавьж буй шаардлагыг хүлээн авахад учир дутагдалтай. Хэрэв төрийн үйлчилгээний албан хаагчдын цалинг үүнээс илүү нэмбэл хөдөлмөрийн хуваарилалтыг шууд үгүйсгэсэн болно” гэсэн хариулт өгсөөр байгаа юм. Үүнээс гадна МҮЭХ-ноос өнгөрсөн баасан гарагт Засгийн газарт дахин шинэ шаардлага хүргүүлсэн. Энэхүү шаардлагад Засгийн газраас Оюутолгой болон Тавантолгойн ордуудад хэчнээн монгол ажилчин, ямар ажил хийхийг ил тод зарла гэжээ. Шаардлагын хариуг ирэх сарын 14 гэхэд өгөхгүй бол МҮЭХ, ажилгүй байгаа залуустай хамтран тэмцэл хийхээ мэдэгдсэн юм.
Монгол Улсын Шадар сайд М.Энхболд тэргүүтэй төлөөлөгчид 13-15-ны өдөр БНХАУ-ын Тяньжин хотод болсон “Зуны Давос 2010”-д оролцсон. Энэ удаагийн хөрөнгө оруулалтын чуулга уулзалт “Тогтвортой хөгжилд хөрөнгө оруулах нь” сэдвийн дор болсон юм. Чуулга уулзалтын үеэр дэлхийн санхүү, эдийн засгийн хямралын дараах үед олон улсын эдийн засгийн өсөлтийг хангах, түүнчлэн дэлхийн уур амьсгалын өөрчлөлттэй тэмцэх нөөц боломж, “ногоон хөрөнгө оруулалт”-ыг дэмжих талаар төр засгийн тэргүүнүүд,олон улсын хөрөнгө оруулагчид, бизнесийн төлөөлөгчид, судлаач нар санал солилцсон юм. Монголын төлөөлөгчид энэ үеэр БНХАУ-ын удирдах албаныхантай уулзаж улс төр, худалдаа, эдийн засгийн хамтын ажиллагаа, дэд бүтэц, уул уурхай, зам тээвэр, соёл, хүмүүнлэгийн болон спортын салбарын хамтын ажиллагааг хөгжүүлэх талаар ярилцсан байна.
“Өмчийн эрх ба эдийн засгийн өсөлт” сэдвээр АНУ-ын Олон улсын хөгжлийн агентлаг, Мянганы сорилтын сангаас өнгөрсөн пүрэв гарагт сургалт зохион байгуулав. Сургалтаар монголчууд хөрөнгийг эдийн засгийн эргэлтэд оруулах талаар огт боддоггүй. Тиймээс Монгол Улс даяар үхмэл хөрөнгө бий болсон гэсэн гаргалгаанд хүрсэн юм. Манай улсын хэмжээнд сая орчим үл хөдлөх хөрөнгө бүртгэгдсэн байх ёстой судалгаа байдаг ч одоогоор 360-370 мянга нь л албан ёсоор бүртгэгдсэн байдаг аж. Харин энэ нь Монгол Улсын үл хөдлөх хөрөнгийн бүртгэлийн газар болон кадастрын байгууллагууд харилцан уялдаагүй ажилладаг гэдгийг баталж байгаа тухай олон улсын мэргэжилтнүүд сануулсан юм.
Засгийн газар төрийн албан хаагчдыг орон сууцжуулах хөтөлбөрийг хэрэгжүүлэх зорилгоор богино хугацаатай бонд гаргаж байгаа. Энэхүү үнэт цаасны арилжаа өнгөрсөн баасан гарагт Монголын Хөрөнгийн бирж дээр болов. Засгийн газрын 30 тэрбум төгрөгийн бонд 365 хоногийн хугацаатай, жилийн 7.5 хувийн хүүтэй, нэг бүр нь 10 сая төгрөгийн өртөгтэйгөөр арилжаалагдсан байна.
ЭБЭХ-ний сайд, албадын дарга нар өнгөрсөн баасан гарагт нүүрс олборлогч уурхайдын удирдлага, эрчим хүчний салбарынхантай зөвлөлдлөө. Эрчим хүчний нүүрсний ихэнхийг олборлодог уурхайнууд болох Багануур, Шивээ-Овоогийн уурхай улсын үйлдвэрийн газар хэлбэрээр ажилладаг учир хөрөнгө оруулалт бараг хийдэггүй байсан. Харин энэ жилээс эхлэн тодорхой хэмжээний хөрөнгө оруулалт хийх болсныг уурхайн удирдлагууд дэмжиж байгаагаа энэ үеэр илэрхийлсэн. Мөн энэ үеэр нүүрс олборлогч компаниудын төлөөлөл хамгийн их тулгамддаг асуудал болох нүүрсний үнэ ханшийн талаар сануулсан. Нүүрсний үнийг тогтвортой барих бодлогыг Засгийн газар хэрэгжүүлдгээс болж уурхайнууд өр, авлагын асуудалд ордог аж. Тиймээс түлшний салбарт үнэ чөлөөлөх асуудлыг даруйхан шийдэхийг хүссэн юм. Үүнээс гадна Шарын голын уурхай энэ жил Дархан-Уул, Сэлэнгэ аймгын нүүрсний хэрэгцээг олборлож чадахгүйгээ салбарын сайддаа дуулгасан юм. Харин энэхүү хүсэлтийн хариуд эрдэс баялаг, эрчим хүчний сайд Д.Зоригт нүүрсний үнийг шат дараатайгаар нэмэгдүүлэхээр болсныг мэдэгдэж, ирэх сард уурхайнуудад олгох татаасын асуудлаар Засгийн газарт санал оруулна хэмээсэн.
Р.САРАНГОО
Зохиогчийн эрх: "Улс төрийн тойм" сонин