“Нийгмийн эрүүл мэндийн талаар төрөөс баримтлах бодлогын хэрэгжилтийг эрчимжүүлэх нь” бүсчилсэн семинар Сэлэнгэ аймагт боллоо. Энэ удаагийн семинарт Эрүүл мэндийн дэд сайд Ж.Цолмон, тус яамны удирдах ажилтнууд болон таван аймгийн 50 гаруй эмч мэргэжилтэн оролцсон юм. Эрүүл мэндийн салбар нь бусад салбараас онцлог, давуу чанар ихтэй, бусад салбартай зүйрлэшгүй ялгаатай гэдгийг дэд сайд онцолж байсан. Энэ удаагийн семинарыг “Мянганы сорилтын сан” ивээн тэтгэж байгаа бөгөөд тус сангаас манай улсад 49 сая ам.долларын төслийг санхүүжүүлж байгаа аж. Семинарын нээлтийн үеэр Сэлэнгэ аймгийн Нэгдсэн эмнэлэгт 2009, 2010 онд төгсөн ирсэн залуу эмч нартаа ахмад эмч нар хүндэтгэл үзүүлж, алтан чагнуураа гардуулан өгөх ёслол болж, ЭМ-ийн дэд сайд Ж.Цолмон залуу эмч нарт хандан хувийн алдаа, хариуцлагагүй байдал гаргахгүй байхыг анхааруулж, хариуцлагатай ажиллахыг хүслээ.