Улаанбаатарт даваа гариг эхлэхийн хамт АНУ-ын Вашингтонд зүүн бүсийн цагаар ням гаригын оройны 22 цаг 47 минутанд Төлөөлөгчдийн танхимд гишүүд 219::212 гэсэн санал хураалтын дүнгээр “Эрүүл мэндийн шинэчлэлийн хуулийг” баталлаа. Ардчилсан намын гишүүдийн үзэж байснаар уг хуулийг батлахын тулд 216 төлөөлөгчийн санал хэрэгтэй болох байсан юм. Энэ хууль батлагдсанаар одоо эрүүл мэндийн даатгал болон бусад тэтгэмжид хамрагдаагүй байгаа 32 сая америк иргэн хуулийн ач тусыг хүртэх юм.
Өмнө нь өнгөрсөн оны 12-р сард Сенатад уг хуулийн төслийг батлах үед мөн ийм ойрхон зөрүүтэй баталж байсан байна.
Мягмар гариг гэхэд ерөнхийлөгч Обама энэ хуульд гарын үсэг зурах болно гэж Конгрессын гишүүд үзэж байна. Олон цаг хэлэлцэж баталсан уг хуулийн дагуу ирэх арван жилд эрэүүл мэндийн даатгалд 940 тэрбум ам.доллар зарцуулах болно.
“Энэ хууль бол 21-р зууны иргэний эрхийн хууль боллоо” гэж Өмнөд Калифорний төлөөлөгч Жим Клайбөрн / Jim Clyburn / энэ хуулийн талаар өөрийн бодлоо илэрхийлэв.

Т.Ариунсанаа