Нийслэлийн Ардчилсан намын зөвлөлдөх хорооны хуралдаан үргэлжилж байна. Гэвч үйл явдлын өрнөл дунд нэлээд өөрчлөлт орлоо. Нийслэлийн Ардчилсан намын даргад УИХ-ын гишүүн Х.Тэмүүжин, Ардчилсан холбооны ерөнхий нарийн бичгийн дарга Ш.Түвдэндорж нарыг нэр дэвшүүлээд байгаа тухай бид мэдээлсэн бол яг одоогоор Ш.Түвдэндорж өрсөлдөгчгүйгээр ганцаараа нэр дэвшиж явна. Учир нь дээрх хуралдаанд УИХ-ын гишүүн Х.Тэмүүжин хоцорч орж ирсэн тул нэрийг нь хасчээ. Мөнхүү энэхүү үйл явдалтай зэрэгцэн УИХ-ын гишүүн С.Эрдэнэ санал хураалтын үр дүнг хүлээн зөвшөөрөхгүй гэдгээ мэдэгдэн, хуралдааныг орхиж гарсан аж. Түүний хамт 20 гаруй гишүүн мөн хуралдааныг орхижээ УИХ-ын гишүүн С.Эрдэнэ хэлэхдээ “Би Хяналтын хороонд гомдол гаргана. Хууль бус ажил явагдлаа” гэжээ. Хэдийгээр экс даргаа 20 гаруй гишүүн даган хуралдааныг орхисон ч ирц намын дүрэмд заасан хэмжээнд хүрч байгаа аж. Тодруулбал, нийслэлийн Ардчилсан намын зөвлөлдөх хорооны хуралдаан 60 гаруй гишүүнтэйгээр хурлаа үргэлжлүүлж байна.
Г.Дарь