Дээрх мэдээллийг түгээгчдийн хэлснээр бол эх орондоо энэ сард багтан ирэхээр болоод байгаа МАХН-ын дарга С.Баяр саяхан намынхаа удирдлагуудтай холбогдон нэгэн чухал зүйл зөвшилцсөн гэнэ. Түүний биеийн байдал нэлээд чилээрхүү байгаа тул намын бага хурлын дараа намын их хурлыг хуралдуулах ч юм уу, эсвэл удирдах зөвлөлд эрх шилжүүлж байгаад МАХН-ын даргын албаа өгөх талаар ярилцсан аж. Нам эзэнгүй удвал ноцтой байдал үүсэх тул С.Баяр дарга дөрөвдүгээр сар гэхэд дараагийн хүнд ажил албаа шилжүүлэхээр шийдсэн юм байх. Экс Ерөнхийлөгч Н.Энхбаярын удаа дараа хэвлэл мэдээллийн хэрэгсэлд өгсөн ярилцлага С.Баярыг ийм үйлдэл хийхэд нөлөөлж, тавгүйтүүлсэн гэх яриа бас байна. Энэ байдал МАХН дотор намын даргын төлөөх “марафон”-ыг өдөөж буй сурагтай.
Жигүүрийн анхны тэргүүн, УИХ-ын Төрийн байгуулалтын байнгын хорооны дарга Ө.Энхтүвшин арай намдуухан “мөлхөө” арга хэрэглэж байгаа бол Засгийн газрын Шадар сайд М.Энхболд МАХН-ын XXY их хурлаар С.Баяр даргад “мөргүүлсэн” даагаа нэхэхээр нэлээд шаргуу бэлтгэж байгаа гэж зарим хэвлэлд мэдээлсэн байна. Түүний арын фронтод МАХН-ын ерөнхий нарийн бичгийн дарга У.Хүрэлсүх байгаа аж. Гэхдээ хамаг хүчээрээ МАХН-ын даргын орон зайн төлөө тэмцэх хүн бол Монгол Улсын Ерөнхийлөгч асан Н.Энхбаяр. Ямар үнээр боловч их улс төрд нөлөөгөө сэргээх нь түүний “номер нэг” зорилго болоод байгаа нь нэгэнт тодорхой болсон.
Д.Өнөр