МАХН-ын залуучууд шинэ даргатай боллоо. УИХ-ын гишүүн Ж.Энхбаяр, С.Бямбацогт, Ш.Отгонбилэг агсны хүү О.Содбилэг гээд олон залуусын нэр дуулдсан ч МАХН-ын Удирдах зөвлөл сүрээрээ далайлган Намын байгуулалтын хэлтсийн дарга Л.Оюун-Эрдэнийг 100 хувийн саналаар сонгуулав. Сүүлийн үед МАХН-ын Удирдах зөвлөл намаа азаргалж, таалсан хүнээ хаана ч ногоон гэрлээр гаргадаг болсны сүүлийн жишээ Л.Оюун-Эрдэнэ болов.

Энэ залуугийн нэр  сүүлийн хоёр жилээс л дуулдаж эхэлсэн юм. “Залуу лектор” төвийн лектор байж телевизээр харагдсаар олны нүдэнд жаахан дасал болсон. Тэгж байснаа МАХН-ын хамгийн том, нөлөө бүхий бүтэц болох Намын байгуулалтын хэлтсийг даргалсан.

Өмнө нь У.Хүрэлсүх, Г.Занданшатар гээд УИХ-ын гишүүд толгойлж байсан МАХН-ын залуучуудыг өчигдрөөс олон нийтэд нэр, нөлөөгөөрөө тийм ч танил бус Л.Оюун-Эрдэнэ манлайлж эхэллээ. Холбооныхоо нэрийг ч Нийгмийн ардчилал, залуучуудын холбоо болгож өөрчлөв. Шат шатандаа “ардчилал”-ыг таалж, “социалист” гэдэг үгээс ихээхэн цэрвэх болсон МАХН-чууд  ийм нэг авцалдаа муутай нэрээр залуучуудаа овогложээ.

 Д.ОЮУН