сургуулиуд олноороо байгуулагдах болсон. Гэхдээ энэ хувийн сургуулиудад
жирийн ардын хүүхэд сурна гэдэг амаргүй. Яагаад гэвэл төлбөр нь өндөр
учраас. Төлбөр өндөртэй хувийн сургуулиудыг “International school of
Ulaanbaatar” гэх сургууль 4500 долларын төлбөртэйгээр магнайлж явна.
Энэ сургуульд манай урлаг соёлын “одод”, улс төрийн зүтгэлтэн,
бизнесменүүдийн хүүхдүүд суралцдаг. Энэ мэтчилэнгийн урт цуваа
цаашаагаа “Hobby”, “Сант”, “Орчлон” гээд явж өгнө. Эдгээр сургуулиудын
сургалтын төлбөр нь 1000-1800 ам.долларын хооронд хэлбэлздэг. Гэхдээ
мөнгө төлж сурсан, мөнгө төлөөгүй сурсан хоёрын хооронд ямар ялгаа
байдаг вэ? Тэдний хажууд элдэв, шалдав мөнгө төгрөг нэхдэггүй ерөнхий
боловсролын сургуулиудын сургалтын чанар бараадах болов уу?
Элсэлтийн ерөнхий шалгалтын үеэр аль сургууль, хэддүгээр байрт
жагссан бэ гэдгийг харвал уг нь зарим нэг зүйл тодорхой болох юм. Энэ
судалгааг хийх ёстой байгууллага нь Боловсролын үнэлгээний төв. Гэвч
тэд өнөөдрийг хүртэл энэ судалгааг хийж байсангүй. Энэ жилээс хийх гэж
оролдож байгаа аж. Элсэлтийн шалгалтад тэнцсэн хүүхдүүдийн нэр,
регистрийн дугаарыг компьютерт хийчихсэн мөртлөө төгссөн
сургуулиудынх нь нэрийг гаргахад цаг их алдаж байгаа гэнэ. Гэхдээ ирэх
аравдугаар сарын дундуур гэхэд энэ судалгааны дүнг харах боломжтой болох
нь.
Энэ жилийн ерөнхий боловсролын сургууль төгсөгчдийн элсэлтийн ерөнхий
шалгалтын дүнг харахад мэргэжлийн бүх хичээлээр Улаанбаатар хотод
шалгалт өгсөн сурагчдын эхний 50 байрт үнэтэй сургуулиудын жагсаалтыг
магнайлдаг “International school of Ulaanbaatar” гэх мэт өндөр төлбөртэй
сургуулийн бараа ч алга. Хувийн сургуулиудаас “Hobby”, “Орчлон”, улсын
сургуулиудаас лицей нэгдүгээр сургууль, бидний хэлж заншсанаар Орос
гуравдугаар сургууль, тавдугаар сургуулиуд багтсан байна.
Мэдээж бүх ерөнхий боловсролын сургуулиуд адилхан хэмжээнд байна гэж
үгүй. Ихэвчлэн хотын төвийн сургуулиудын сургалтын чанар нь гайгүй
байна.
Эндээс харахад их мөнгө төлж сурах, мөнгө төлөхгүй сурах хоёрын хооронд
ямар ч ялгаа алга. Тиймээс Боловсрол, соёл, шинжлэх ухааны яам хувийн
их, дээд сургуулиудыг магадлан итгэмжилдэг шигээ хувийн дунд
сургуулиудыг магадлан итгэмжлэхгүй бол болохгүй нь. Гэхдээ тэр
итгэмжлэл нь байрны тохижилтыг харах биш сургалтын чанарыг нь харж
итгэмжилдэг баймаар. Учир нь хүмүүс хүүхдээ чанартай боловсрол
эзэмшүүлэх гэж арван хэдэн сая төгрөг зарлагадаад байхад хүүхэд нь сайн
их, дээд сургуульд орж чадахгүй бол дэндүү харамсалтай.
Ерөнхий боловсролын сургуулиудад бас асуудал байна аа. Гүнзгий анги
хэмээн нэрлэсэн сарын 95 мянган төгрөгийн төлбөртэй анги байх. Гэтэл
хуулиндаа “ерөнхий боловсролыг үнэ төлбөргүй олгоно” гээд заачихсан
байдаг. Тэгсэн мөртлөө гүнзгий ангийн үздэг хичээл, жирийн ангийн
үздэг хичээл хоёр нь хоорондоо бараг ялгаагүй байгаа юм. Элсэлтийн
ерөнхий шалгалтан дээр жирийн ангийн хүүхэд нь, гүнзгий ангийнхаа
хүүхдийн дээр гарч л байдаг. Энэ бүгдээс харвал хувийн болон улсын
сургууль, гүнзгий болон жирийн ангид сурах нь ямар ч ялгаагүй, зөвхөн
тухайн хүүхдээс хамааралтай ч юм шиг.
Гадны орнууд тухайлбал Сингапур оронд дунд сургуулиудыг гурван
зэрэглэлд оруулсан байдаг. Зэрэглэлд орсон сургуулиудын төгсөгчдийн
чанараас хамаарч аль зэрэглэлээс хасч, аль зэрэглэлд оруулахыг шийддэг
байна. Тэнд хувийн сургууль нээнэ гэдэг амаргүй. Сингапурт очсон гадны
иргэн сургууль байгуулна гэвэл бүр ч хатуу. Харин манайд бол гадны хүн
хүрч ирээд сургууль байгуулаад, төлбөрөө дуртайгаараа хэлээд явж байгаа
нь хариуцсан яамны бодлоготой л холбоотой.
Мөнгө төлж сурах уу, төлөхгүй сурах уу?