Бид энэ удаад арилжааны банкуудын нэлээд хүчтэй “гар” болох үл хөдлөх хөрөнгө зуучлалын компаниудын талаарх мэдээллийг хүргэж байна. Үл хөдлөх хөрөнгө худалдах, худалдан авах харилцаа нь дэлгүүрээс талх авахтай адил өдөр тутам хийдэг хялбар ажил биш тул аль аль талаас ихээхэн хариуцлага шаарддаг. Ер нь энэ төрлийн худалдаанд хэн дуртай нь оролцож, хүссэн бүхэн хийх боломжгүй гэсэн үг. Зөвхөн энэ чиглэлээр мэргэшсэн хувь хүн, аж ахуйн нэгжүүд л тухайн хөрөнгийг зах зээлд нийлүүлэх гэж буй тал болон худалдан авагчдын дунд зуучлалын үйлчилгээ үзүүлж, ашиг олдог. Зах зээлийн эдийн засагтай улс орнуудад үл хөдлөх хөрөнгийн худалдаа нь гараас гарт бус, зөвхөн зуучлалын агентуудаар дамжих нь түгээмэл үзэгдэл. Харин манай улсад ийм байгууллага хангалттай олон ч зуучлалын үүргээ жинхэнэ утгаар нь хэрэгжүүлж буй байгууллага ховор гэж хэлж болох юм. Яагаад гэвэл, арилжааны банкууд иргэдэд үл хөдлөх хөрөнгийн зээл олгож, хүүгийн ашиг олохоос гадна өөрсдөө зуучлалын компани байгуулж давхар ашиг хүртдэг үзэгдэл нэлээд түгээмэл ажиглагдах болсон. Энэ нь хэрэглэгчдэд ач тустай байвал муу зүйл биш л дээ. Гагцхүү зуучлах нэрээр хэт их ашиг олох гэж хичээсний гайгаар тухайн салбарын зах зээлийг бүр түгжиж байгаад л хамаг учир байгаа юм. Тэр ч бүү хэл банкны гар хөл болсон зуучлалын компаниуд замбараагүй ажилласнаас үүдэн барилгын салбарыг хямрал руу түлхсэн жишээ ч бий. Тодруулбал, дэлхий нийтийг хамарсан санхүү, эдийн засгийн хямралын чимээ хаа сайгүй хангинаж байсан 2008 онд үл хөдлөх хөрөнгө зуучлалын компани ёстой л борооны дараах мөөг шиг олноороо байгуулагдсан. Тухайн үед шинээр баригдсан нийт барилгууд бараг бүгд зарагдаад дуусчихлаа гэсэн итгэмээргүй мэдээлэл цацагдаж байсан юм. Гэтэл хэзээ хойно нь шинэ орон сууцнуудын 80-90 хувь нь хэрэглэгчдэд хүрээгүй зуучлалын компаниудын “халаасанд” тэр чигээрээ байж байлаа. Энэ нь банкууд өөрсдийн байгуулсан зуучлалын компаниудаар дамжуулж давхар ашиг олох гээд бүтэлгүйтсэнийг нотлох нэг баримт яах аргагүй мөн. Зарчмын хувьд зуучлалын компаниуд тухайн хөрөнгийг худалдан авах хэрэглэгчээ баталгаатай сонгож, гэрээ контракт хийсний дараа л хөрөнгийн төлбөрийг төлөх учиртай. Харин дээрх тохиолдолд зуучлалын компаниуд банкуудаас шууд хамааралтай байсан учраас төлбөр төлөх асуудал тийм ч хэцүү байгаагүй. Зуучлалын ганцхан компани л гэхэд хэдэн арван орон сууцны хорооллыг дангаараа борлуулах гээд зүтгэсэн. Энэ бол банкныхны том тоглоом. Гэхдээ хамгийн зэвүүн нь барилгын компаниудад мөнгийг нь бэлнээр өгөлгүй хүлээлгэсэн байдаг. Зүгээр л “Найдвартай зуучлагч богино хугацаанд орон сууцыг чинь зараад өгнө” гэж итгүүлсэн. Ингэх нь ч амар гэж барилгын компаниуд итгэсэн. Мөн анх барилга барихад нь бодит зах зээлээс үл харгалзан хөрөнгө оруулалтын зээлийг хүссэн хэмжээнд нь олгосон болохоор барилгын компаниудын хувьд банкуудын тулгасан болзлоос татгалзах ямар ч эрхгүй. Гэтэл банкуудын энэ их шуналаас шалтгаалан үнэ нь хэт өссөн орон сууцыг худалдан авах төлбөрийн чадвартай хүн олддоггүй. Ингээд л барилгын салбар гацаанд орох нөхцөл бүрдсэн нь тэр. Уг нь банкууд зөвхөн зээлийн бүтээгдэхүүн гаргах үүргээ гүйцэтгээд илүү харахгүй явсан бол байдал өнөөдөр шал өөр байх байсан гэхэд нэг их буруудахгүй л болов уу. Ядаж л орон сууцны үнэ өнөөдрийнх шиг ийм өндөр түвшинд хүрэхгүй шүү дээ. Энэ мэтээр барилгын салбарыг хямралд оруулахад арилжааны банкууд чухал үүрэг гүйцэтгэсэн гэдгийг маш ойлгомжтой тайлбарладаг эдийн засгийн шинжээч олон бий.
Ерөөсөө зуучлалын компаниуд хөрөнгө зуучилж ашиг олдог гэхээсээ илүү шинэ, хуучин орон сууц барьцаанд авч үнэ хөөрөгддөг муу зантай. Тэд ардаа нэг нэг том банктай учир аливаа бичиг баримтын бүрдүүлэлтэд санаа зовдоггүй. Төрийн байгууллагуудтай ч холбоо сүлбээтэй. Хувь хүн Улсын бүртгэлийн ерөнхий газрын Эд хөрөнгийн эрхийн бүртгэлийн газарт өөрийн хөрөнгөө баталгаажуулж, бүртгүүлнэ гэдэг амар ажил биш. Маш их хүндрэл учирдаг. Хэн нэгэн хүн үл хөдлөх хөрөнгөө банкинд барьцаалах шаардлага гарахад маш олон шат дамжлагаар явдаг. Харин зуучлалын компаниар заруулъя гэвэл тэд таны өмнөөс бүгдийг нь хийгээд өгнө. Энэ нь өнгөн талаасаа давуу тал юм шиг харагдавч цаагуураа ямар их “хор найруулж” чаддагийг нь илтгэж байгаа юм. Мөн иргэдэд зуучлалын үйлчилгээ үзүүлэх, зээл лизинг санал болгохдоо өөрсдийг нь төрүүлсэн эцэг эх болох банктайгаа заавал холбож өгөх үүрэгтэй. Энэ бол тэдний гол үүргийн нэг юм. Энэ нь иргэдийн мэдлэггүй байдлыг далимдуулан шударга бусаар ашиг олох нэг хэлбэр тул зарим нь ямар банктай холбоотой гэдгээ аль болох нууцлахыг хичээдэг. Гэхдээ аль компани ямар банкнаас зээл авахыг санал болгодгоос тэдний харилцан хамаарлыг хялбархан мэдэж болно. Жишээ нь, “Актив зууч”-ийнхан “Хас” банктай хамтран ажилладаг. Эднийх 2007 оны аравдугаар сараас үйл ажиллагаагаа эхлүүлсэн. Мөн нэг бус, нэлээд хэдэн банктай хамтарч ажилладаг компани ч бий. Тодруулбал, үл хөдлөх хөрөнгө зуучлалын “Экас интернэшнл” ХХК нь “Хас”, “ХААН” банктай хамтран ажилладаг. Харин энэ салбартаа нэлээд томд тооцогддог “ОСМО” зуучлалын компанийнхан үйл ажиллагаагаа төрөлжүүлж, арилжааны банкуудтай хамтран ажиллах үүрэг бүхий “Камка” хэмээх охин компани хүртэл байгуулсан байх жишээтэй. Ямартай ч зуучлалын олонхи компанийн ард аль нэг арилжааны банк байдаг гэдэг нь тодорхой. Ямар сайндаа л бор зүрхээрээ зуучлалын компани байгуулаад олигтой амжилтад хүрээгүй нэг залуухан захирал “Аль нэг банкнаас дэмжлэг авахгүй л бол хол явахгүй юм байна. Өнөөдөр нэр хүндтэй гэгдэж байгаа зуучлалын компаниуд чинь бүгд банкны мэдлийнх” хэмээн хэвлэлд ярилцлага өгч байх билээ. Арилжааны банкуудын эзэд гэж айхтар улс шүү. Өөрсдийн үндсэн үүргээ нэр төртэй гүйцэтгэж чадахгүй хэл аманд байнга ордог хэрнээ хаана л ашиг олох нүх сүв байна тийш шургалж явах юм. Тэдний гар хөл хаана явна тэнд өрсөлдөгчдийнх нь төдийгүй хэрэглэгчдийн эрх ашиг байнга хохирч байх юм. Иргэд энэ мэт нарийн ширийн учрыг нь сайн мэддэггүй болохоор зуучлалын компаниудыг шууд л өнгөн талаас нь дүгнэнэ. Аль нэг банктай холбож өгвөл бүр ч илүү баталгаатай гэж ойлгоно. Харин эцсийн дүндээ хэрэглэгч бус, хэлхээ сүлбээтэй нөхөд л ашиг хүртэж байна бус уу.
Ч.ДАШДЭЛЭГ
Зохиогчийн эрх: "Улс төрийн тойм" сонин